La sala tolosana La Cave Po aculhiguèt lo 1r d’octòbre passat un espectacle scenic en omenatge a l’anarcosindicalista catalan Joan Peiró, mòrt en 1942. Entitolat Peiró 42, l’espectacle se tenguèt dins la Ciutat Mondina en catalan sostitolat en francés de la man de las produccions Clack, dins una mesa en scèna simbolica pr’amor que la pèça a portat “l’anarcosindicalisme catalan de Peiró aquí ont poguèt pas arribar dins son exili”, çò diguèt Eloi Aymerich, director del projècte. D’efièch, Joan Peiró foguèt arrestat per la Gestapo mentre qu’anava a Narbona, e foguèt liurat a las autoritats de Franco que l’executèron en 1942.
 
L’espectacle Peiró 42 es una virada itineranta que comencèt a Mataró (Catalonha) en octòbre de 2017 e es passada per mai d'una vila. Tolosa es la primièra vila que l’a vesitada defòra de l’estat espanhòl, e an causit la Vila Ròsa perque es considerada coma la capitala de l’exili republican.
 
L’espectacle presenta d’intervencions teatralas, de musica e d’audiovisual amb la participacion del duo valencian Borja Penlba e Mireia Vives e dels actors Jaume Amatller, David Pruna, e Izaskun Larrea. S’agís del fruch d’una comission ciutadana creada a l’ocasion dels 75 ans de l’assassinat de Peiró, compausada per una quarantena d’associacions, de partits politics, de sindicats e de divèrses collectius.
 
Joan Peiró i Belis (1887-1942) foguèt un militant anarcosindicalista catalan fòrça conegut après aver fondat a Mataró una usina de veire cooperativa pionièra en servicis socials. Durant la Segonda Republica espanhòla, quand lo sindicat anarquista CNT faguèt partida de son govèrn, Peiró venguèt ministre de l’indústria. Exiliat après la victòria del còp d’estat faissista del general Franco e sa resultanta guèrra civila, Peiró foguèt arrestat en Occitània per la Gestapo e fusilhat près de Valéncia per las autoritats faissistas que tenián lo poder en Espanha. En 1989, son còrs foguèt menat a Mataró ont los ciutadans li rendèron un pertocant omenatge.