Cada an, la revista nòrd-americana Time designa lo sieu personatge de l’annada. Lo títol, pasmens, a doas versions: la dels legeires, a partir d’un vòte popular sus Internet, e la dels redactors de la revista. Dins lo primièr cas, se sap ja qual es lo ganhant de l’an 2012: lo dirigent suprèm nòrd-corean Kim Jong Un. Lo successor de Kim Jong Il dempuèi decembre passat a obtengut 5,6 milions de vòtes, lo doble del segond classificat, quitament quand en la Corèa del Nòrd l’accès a Internet es practicament impossible. Lo succès s’explica, en part, per la campanha de grops d’hackers e de forums, que n’an impulsat la nominacion amb de programas especials.
 
Darrièr Kim Jong Un son demorats lo comedian comic Jon Stewart (2,3 milions de vòtes), los immigrants sens papièrs (1,5) e la campiona olimpica Gabby Douglas (1,5), en mai d’Aung San Suu Kyi e Thein Sein (1,4), Stephen Colbert (1,4), Chris Christie (1,3), Hillary Clinton (1,3), Ai Weiwei (1,1), lo president egipcian Muhammad Mursi (874 486 vòtes) e lo dirigent sirian Bashshar Al Asad (857 339).
 
Lo vòte sus Internet es pas l’eleccion annala del personatge de l’an de Time, qu’es decidida pels redactors de la revista. Aquel resultat se farà conéisser lo 19 de decembre e la persona, o lo collectiu ganhant, ocuparà la primièra pagina de la revista.
 
Ça que la, Kim Jong Un foguèt ja sus la primièra pagina de Time lo 27 de febrièr passat.