Las darrièras arrestacions de sèt joves independentistas catalans, encarcerats a Madrid jos l’acusacion de terrorisme, an fach reagir un vintenat de musicians qu’an publicat una cançon en catalan, occitan, castelhan e basco. Amb aquela cançon los artistas catalans e bascos ─e l’occitana Alidé Sans─ vòlon denonciar “la persecucion de l’independentisme”
 
La cançon es entitolada Un somni immens (un sòmi immens), l’a escricha e compausada Àlex Pérez e l’a publicada la revista catalana de musica Enderrock que ditz qu’aquò “es la primièra partida de la responsa dels musicians a la situacion politica que la viu lo país, e encoratja lo pòble a se mobilizar”. A mai, la redaccion anóncia una segonda cançon que sortirà tre que serà coneguda la senténcia contra los presonièrs politics catalans, probablament la setmana venenta. Aquela nòva cançon aurà per tòca de venir “la banda sonòra de las mobilizacions per la defensa dels dreches e de las libertats del movement independentista”.