Lo president de Turquia, Recep Tayyip Erdoğan, anoncièr ièr lo començament de l’invasion del Curdistan Occidental tanben nomenat Rojava, après lo retirament de l’armada estatsunidenca que sosteniá las dichas Fòrças Democraticas Sirianas (SDF). Qualques minutas après l’anóncia, d’avions turcs de guèrra comencèron de bombardar la vila frontalièra de Serêkanî (Ras Al Ayn, en arabi) e l’entorn d’Ar-Raqqa. La cadena CNN Türk retransmetèt las atacas en dirècte.
 
En agost, Turquia e los Estats pachèron la creacion d’una “zòna segura” ont Ankara vòl remandar los refugiats sirians qu’a l’ora d’ara son en Turquia. Segon Erdoğan, l’armada agirà contra las fòrças curdas e l’autoproclamat Estat Islamic. “La mission es d’evitar la creacion d’un corredor de la terror long de la frontièra sud e de pacificar la zòna”, çò disiá lo president turc sus Twitter.
 
Diluns de matin, lo president estatsunidenc, Donald Trump, estonèt lo Mond en anonciant que retirava son armada del nòrd de Siria, en abandonant de facto los curds, e mai foguèsson estats sos principals aliats en la lucha contra l’Estat Islamic. Los curds govèrnan Rojava dempuèi 2013 amb d’autres grops etnics e religioses.
 
Aquela operacion qu’Erdoğan ven de menar contra los curds en Siria es pas la primièra. En 2016, activèt la nomenada operacion Escut d’Eufrates amb l’intencion d’evitar la temptativa curda de connectar territorialament tot Rojava. Lo projècte curd, tre lo començament de la guèrra, èra d’obténer la continuitat territoriala entre las tres zònas de majoritat curda del nòrd de Siria —Efrîn, Kobanê e Cizîrê—, mas Turquia e sos aliats rebèls lancèron l’Operacion Escut d’Eufrates, contrarotlèron Al-Bab —qu’èra l’objectiu final de las SDF— e atal empachèron que Rojava pervenguèsse a la continuitat territoriala completa.
 
Dos ans puèi, Turquia ataquèt dirèctament Efrîn amb la dicha operacion Branca d’Olivièr. L’armada turca lancèt una ofensiva contra lo costat curd après que los Estats Units e Russia aguèron declarat que reagirián pas.. L’operacion durèt unes seissanta jorns e daissèt mai de 150 000 refugiats. Dempuèi aquel moment Amnestia Internacionala acusa Turquia de cometre de detencions arbitràrias, de desaparicions forçadas, de confiscacions de proprietats e de sacatges.