Aqueste dimècres 9 d’octòbre, los collegians de la Canorga (Causse de Sauvatèrra) descobriguèron la flòra e los toponims occitans a l’entorn. Josiana Ubaud, etnobotanista, matematiciana e lexicografa dins lo domeni occitan, venguèt presentar diferentas espècias localas als escolans. Aquela accion se debanèt dins l’encastre del projècte federador, orientat aquel an devèrs l’uman e sa relacion amb l’environament, a l’escasença de la Setmana de la Sciéncia.
 
D’efièch, los escolans notèron que los toponims loseròts s’apièjan directament suls païsatges que los environan e que s’escrivon e se dison...en lenga nòstra! Aital lo masatge de Fraissinet designa lo pichon bòsc de fraisses, Laborie, evòca la bòria plantada sul luòc, e Saint-Germain-du-Teil fa referéncia als telhs que florisson pertot dins lo vilatge.
 
Per quant a ela, l’especialista en botanica expliquèt los diferents usatges populars d’aquelas espècias, en nos recordant que l’òme s’es totjorn pogut adaptar e se servir de la natura que l’environa dins sa vida vidanta; lo laurièr, franc de son emplec culinari, aparava del tròn, la tisana de fraisse es encara reputada benfasenta contra los raumatismes e la de ronzàs es utila contra lo mal de garganta.
 
Pendent la matinada, los escolans an reconquistat lo sens de còps desmembrat dels noms de luòcs occitans per se familiarizar mai que mai a lor patrimòni local.
 
 
 
 
Barbara Rouquette
 

 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…