Almens vint e sèt personas foguèron tuadas en una fusilhada dins una escòla de primària de Connecticut, als Estats Units. Dètz e uèch son d’enfants. La fusilhada se debanèt divendres passat pauc abans 10h, quand l’atacant intrèt al principal burèu de l’escòla de primària Sandy Hook, dins la vila de Newtown, e comencèt de tirar indiscriminadament. Segon la polícia, l’atacant es tanben mòrt.
 
Segon las darrièras informacions, l’autor, un jove d’un vintenat ans, seriá lo filh d’una professora de l’escòla, que seriá estada tuada. Aquel poiriá aver tirat fins a un centenat de còps de fuòc amb un fusilh d’assaut dins una de las salas, segon la cadena ABC.
 
Qualques enfants an capitat de sortir acompanhats per de professors, mas una ora après l’eveniment, i aviá encara d’enfants dins l’escòla. La bastissa foguèt entornejada per d’agents de la polícia pendent tota la jornada, e los espitals en estat d’alèrta.
 
Los mai de 600 escolans de l’escòla Sandy Hook, ont se passèt la massacre, e d’autres centres educatius del parçan foguèron evacuats coma mesura preventiva, segon de fonts oficialas.
 
La fusilhada se debanèt a 09h40 (15h40, ora d’Occitània). Segon la cadena WABC, l’agressor, de 24 ans, portava quatre armas e un gilet parabalas. De fonts de la polícia an examinat la preséncia d’un segond agressor, après que qualques testimònis ajan raportat qu’avián ausit fins a dotze tirs, çò ditz CBS.
 
Segon lo pòrtavotz de l’Ostal Blanc, Jay Carney, qu’a descrich los faches coma “tragics”, lo president dels Estats Units, Barack Obama, es totjorn al fil dels faches raportats pel governador de l’estat e per l’FBI. 



Mai d'informacions:

CBS: Children, gunman dead in Conn. elementary school shooting
Hartford Courant: AP: 27 Dead, Including 18 Children, At Sandy Hook School Shooting In Newtown
New York Times: Multiple Fatalities Reported in Shooting at Connecticut Elementary School