De milièrs de ciutadans de l’Eqüator tornèron prene las carrièras diluns de ser, mas ara per festejar l’acòrdi entre lo govèrn e los manifestants, majoritàriament indigènas, qu’a mes fin a 12 jorns de protèstas. Lo president Lenín Moreno s’es engatjat a levar lo decret qu’impausava de mesuras coma la supression de las ajudas pels carburants e la reduccion dels salaris dels emplegats publics temporaris.Las doas parts se son engatjadas a restablir la patz.
 
Après dotze jorns de susmautas, de representants dels manifestants e del govèrn se son amassats en fin de dimenjada per negociar. Qualques oras pus tard, arribèron a l’acòrdi. Lo coordinator de las Nacions Unidas en Eqüator, Arnaud Peral, confirmèt que gràcias al dialòg lo govèrn daissava “sens efièch lo decret 883”, qu’establissiá de mesuras de liberalizacion. A mai, totjorn segon Peral, “se formarà una comission qu’elaborarà un nòu decret”. Una comission que serà compausada per de representants del govèrn e del movement indigèna, e  beneficiarà de la mediacion de l’ÒNU e de la Conferéncia Episcopala del país.
 
Las protèstas an ocasionat de fòrts rambalhs e d’afrontaments amb la polícia qu’an quitament tuat almens 7 personas, segon de donadas oficialas. Segon los manifestants, i auriá almens 10 mòrts, mai de 100 desapareguts e environ 2000 personas nafradas. E mai an denonciat que la polícia a practicat de torturas.