Los ministres dels govèrns francés e alemand e los caps de l’executiu d’aqueles dos païses se reüniguèron ièr en Occitània. Tolosa aculhiguèt ièr aquela amassada dins una mobilizacion policièra sens precedents. L’estat mobilizèt environ 2500 policièrs de 18 esquadrons e 14 companhiás dins la Ciutat Mondina, que vegèt de restriccions de circulacion e d’estacionament mentre que s’enebissiá als ciutadans del departament de portar de produches quimics o inflamables, de material de fuòcs d’artifici, de fumigèns e de petards. S’interdiguèt tanben la venda al detalh dels carburants.
 
Los govèrns dels dos païses se son reünits dins un contèxt politic agitat marcat per la crisi en Catalonha, lo Brexit e l’invasion turca de Rojava.
 
Èra previst d’estudiar los projèctes conjonches coma lo servici civil francoalemand, lo manual escolar d’istòria comuna, l’unitat francoalemanda de proteccion dels eveniments, lo regim de maridatge comun pels parelhs amb los dos ciutadanatges (francés e alemand) e lo regropament d’ambaissadas, de consolats e d’institucions culturalas.
 
En seguida d’aquela reünion, se ten uèi a Brussèlas la cima del Conselh d’Euròpa marcat tanben pel Brexit, l’invasion turca de Rojava e la crisi en Catalonha.