Après lo succès del primièr volum, es paregut ara lo segond volum de l’Istòriade lacosinacatalana eoccitana, aqueste còp consagrat als topins e als legums. Es previst que l’òbra comprenga dètz volums, que siá completament acabada dins dètz o dotze ans. “Costarà una vida entièra, mas soi una persona fòrça pacienta”, çò declarava l’autor, Vicent Marqués.
 
Marqués es cosinièr e escrivan, e nasquèt a Valéncia en 1950. A publicat de romans e de libres de cosina tradicionala. Fa aperaquí quaranta ans que comencèt la recèrca de donadas per escriure aquesta istòria de la cosina catalana e occitana que son segond volum ven de sortir.
 
Se lo primièr volum ─consagrat a las salsas, als aperitius, a las ensaladas e a las sopas─ foguèt una bèla reüssida de 200 monografias e mai de 300 recèptas; aqueste segond volum, dedicat als topins e legums, nos explica, en 920 paginas, cossí podèm aprestar los plats del temps que ne fornís un percors istoric, filologic, literari e cultural. “Una pèça d’art”, segon lo reputat cosinièr catalan Ferran Adrià.
 
L’òbra cèrca de sarrar del legeire çò de melhor de la cosina populara d’Occitània e dels Païses Catalans. Malgrat que siá editada en catalan, Jornalet publica cada doas setmanas en occitan qualques unas de las melhoras recèptas de la cosina occitana, en ne fasent un pauc l’istòria.
 
 
Bon apetís!
 
 
 

MARQUÉS, Vicent. Història de la cuina catalana i occitana (volum 2). Edicions Sidillà, 2019. 920 paginas. 30 èuros.