Catalonha a viscut aquesta setmana passada las protèstas pus multitudinàrias e eterogenèas de son istòria. Divèrsas accions de protèsta an amassat la societat catalana per tot lo país, amb de marchas de 100 quilomètres, de barraments d’estradas e de carrièras, de manifestacions, l’ocupacion de l’aeropòrt de Barcelona etc... L’indignacion dels ciutadans envèrs las senténcias de 9 a 13 ans de preson que ne son victimas nòu personalitats independentistas catalanas, a tocat de mond de totas las generacions e posicions socialas.
 
A tot aquò cal apondre los rambalhs violents que los an patits las principalas vilas dels Païses Catalans, una violéncia qu’es venguda lo sol argument de l’espanholisme per refusar lo dialòg mas qu’es clarament marcada per d’abuses fòrça grèus denonciats per las associacions umanitàrias e pacifistas e quitament per Barcelona en Comun (partit de la consolessa màger de Barcelona, Ada Colau).
 
Tant Amnestia Internacionala coma lo defensor dels dreches dels ciutadans en Catalonha, Rafel Ribó, denóncian d’abuses, de provocacions e d’umiliacions de las fòrças de l’òrdre del temps que lo collectiu Som Defensores (Sèm Defensoras) es a collectar aquelas accions. De son caire, l’observatòri catalan dels mèdias Mediacat a registrat 58 jornalistas agarrits per la polícia mentre que fasián lor trabalh.
 
Lo vidèo que seguís amassa d’imatges de qualques unes d’aqueles abuses comeses per las fòrças de l’òrdre pendent los cinc primèrs jorns de repression. Es un resumit plan petit, mas fòrça explicit de çò que se passa:
 

La policia española lleva 5 dias reprimiendo en Cataluña. Cada dia cientos de imágenes de violencia cada dia. Un -muy pequeño resumen- de lo que está pasando en las calles de Barcelona. El Gobierno teme que esto se vea fuera de España. Ayúdanos a difundir. pic.twitter.com/22011HERqW

— Albano-Dante Fachin (@AlbanoDante76) October 19, 2019

 
 
De nombroses nafrats
 
Segon las donadas del servici catalan de la santat, aperaquí 600 manifestants an agut de besonh d’assisténcia medicala. Qualques unes son espitalizats e una joventa se tròba en estat grèu per un traumatisme cranian. Segon aquelas donadas, i a ja quatre personas qu’aurián perdut un uèlh a causa de las balas de goma. S’agís d’una municion exprèssament enebida pel Parlament de Catalonha, mas que lo ministre espanhòl de l’Interior permet a la polícia de son país, car es comandada de Madrid estant.
 
 
28 manifestants en preson
 
Mentretant, los manifestants detenguts per la polícia riscan d’anar en preson jos l’inculpacion de terrorisme. Un detengut es estat embarrat dins una preson de Madrid e d’autres vint e sèt dins de presons de Catalonha.