capçalera campanha

Actualitats

Internacional

Vesita suspresa de Pedro Sánchez a Barcelona

Lo primièr ministre espanhòl es anat saludar los policièrs espanhòls que reprimisson las manifestacions e a vesitat un agent espitalizat. Los mètges e infirmièrs l’an escridassat

De manifestants se recampavan davant lo sèti del govèrn espanhòl en portant d’afichas que disián en anglés “Spain, sit and talk” (Espanha, asseta-te e parla), en reclamant que lo cap espanhòl respondèsse al dialòg que li requerís lo govèrn catalan
De manifestants se recampavan davant lo sèti del govèrn espanhòl en portant d’afichas que disián en anglés “Spain, sit and talk” (Espanha, asseta-te e parla), en reclamant que lo cap espanhòl respondèsse al dialòg que li requerís lo govèrn catalan | @MarinaBerni
Mentre que contunhan las mobilizacions en Catalonha, lo primièr ministre espanhòl, Pedro Sánchez, vesitèt ièr Barcelona mas refusèt de rescontrar lo president de la Generalitat, a qui refusa de respondre al telefòn. Sánchez anèt per suspresa dins la capitala de Catalonha per saludar los policièrs espanhòls que se baton dempuèi mai d’una setmana contra lo mond que protèstan.
 
La vesita s’anoncièt oficialament a 8h del matin, e devèrs 10h lo cap de l'executiu espanhòl èra al comissariat de la polícia nacionala de Barcelona per saludar sos representants. Puèi vesitèt l’espital de Sant Pau, ont se tròba un policièr espitalizat. Aquí, la molonada empediguèt l’intrada per la pòrta principala e lo president de govèrn deguèt passar per la pòrta de las urgéncias. Dintre, los mètges e lo personal de l’espital escridassèron Sánchez.
 
 
 



Refusa de parlar amb lo president de la Generalitat
 
Mentretant, de manifestants se recampavan davant lo sèti del govèrn espanhòl en portant d’afichas que disián en anglés “Spain, sit and talk” (Espanha, asseta-te e parla), en reclamant que lo cap espanhòl respondèsse al dialòg que li requerís lo govèrn catalan.
 
De matin, Sánchez aviá telefonat a la consolessa màger de Barcelona, Ada Colau, que li demandèt tanben que parlèsse amb lo president de la Generalitat.
 
D’efièch, lo president catalan aviá ja mandat diluns passat una letra a Sánchez e al rei Felip VI. Èra lo jorn que se coneguèt la senténcia de la Cort Suprèma espanhòla contra los presonièrs politics catalans. En aquela escasença, Torra demandava una reünion urgenta amb eles compte tengut de “la gravetat de la situacion”.
 
Catalonha viu de protèstas massissas de tota sòrta dempuèi lo 14 d’octòbre passat quand se publiquèron las senténcias de 9 a 13 ans de preson que ne son victimas nòu personalitats independentistas catalanas. Aquel fach a indignat de mond de totas las generacions e posicions socialas.
 
 
Perquisicions
 
Diluns tanben foguèt una jornada marcada per las perquisicions que toquèron lo domicili de Gonzalo Boye, avocat de Carles Puigdemont, qu’ara l’acusan de malversacion e de delictes contra la santat publica. En mai d’aquò, una agéncia de viatges de Vic, que Òmnium e l’ANC ne son clients, foguèt tanben perquisicionada per la Gàrdia Civila.
 
   

 
abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

francesc palma
4.

En Pocavergonha portava dins l'auto un policia amb una metralhadora que la mostrava fasent coma si apuntàs a la gent. Los Drets Umans encara non an arribat a Espanha, ni volen saber que son, l'audiencia,lo suprem,lo constitucional non an incorporat los Drets Umans de l'ONU del 1948. Abans deian que si que espanha era de las democracias mai avançadas. En teoria deien que Espanha aplicava tata la legislatura internacional, mas ara que li tocava aplicar la ,doncs fan coma se no o sabessin coma lo Pocavergonha, que posa una cara coma se la causa no anàs amb el.

  • 6
  • 0
Pitaluga
3.

A fach fogassa!
Aqueles espanholistas son victimas del metòde Coué: a dich de publicar de messorgas totes azimuts finisson que se las creson.
Ardits, catalans! Espanha trampalèga! Ja es quicòm, mas seriá damatge que foguèsse de badas.

S'es elegit, aqueste socialista de pacotilha cambiariá pas gaire de discors: es apiejat pel Felipe Gonzalez, lo Dieu tutelar del P « S O» E, qu’es vengut clarament de drecha e espanholista e lo buta a formar una majoritat amb lo PP corromput.

P.-S: « Dios » èra lo nom de còdi que s’èra atribuïtlo Gonzalez dins las conversacions internas del PSOE del temps qu’èra primièr ministre "socialista" trionfant… e que faguèt dintrar Espanha dins l’OTAN….

  • 15
  • 1
Felip Martèl Montpelhier
2.

Chau pas eissubliar que Sanchez es en campanha electorala, e que sos sondatges son a baissar : se sente doncas compelit de donar de gatges als electors espanhòls que vòlon la firmetat fàcia als michants catalans. Es per aquò que jua los machos en anant veire e parlar ren qu'als flics espitalizats e en exigent de Torra que se sotmesse faiçon borgeses de Calais dins los manuaus de mon enfància. Ganhesse e arribesse a se donar una majoritat (çò qu'es ren segur, mas l'alternativa es una coalicion PP, Vox e C's...) benlèu chambiarè de ton. O pas. Au ponch que siam, veio pas de surtia evidenta...

  • 12
  • 0
Black Blòc Joe
1.

Cronica del racisme e del mesprètz ordinari d'una dictatura coloniala davant sos colonizats…

  • 16
  • 1

Escriu un comentari sus aqueste article