Lo deputat occitan Jean-Luc Moudenc, que foguèt cònsol de Tolosa entre 2004 e 2008, a pausat una question al govèrn francés a respècte de l’acòrdi signat en octòbre passat entre l’entrepresa publica Voies Navigables de France e France AgriMer, tocant lo transpòrt de cerealas pels canals de l’Estat francés. Segon lo deputat Moudenc, lo transpòrt de granatges pels canals de l’Estat francés es una bona escasença per promòure lo desvolopament economic, en prenent en compte que lo ret de canals franceses es lo mai grand d’Euròpa e que l’Exagòn es un dels productors mai importants de cerealas del Vièlh Continent. Dins aquel sens, França produsís qualques 65 milions de tonas de granatges cada an. La letra del deputat occitan s’adreiça a la ministra de l’Ecologia, del Desvolopament Sostenable e de l’Energia, Delphine Batho.
 
Pasmens, la question fa referéncia al fach que tant lo Canal de las Doas Mars al sens estrech (que li dison oficialament lo “Canal del Miègjorn”), coma lo Canal de Garona, son los canals idonèus per connectar l’Ocean Atlantic amb la Mar Mediterranèa. Aqueles dos canals son excluses de las vias navigablas que seràn avaloradas e estudiadas per un grop de trabalh qu’aurà d’analisar lo potencial del transpòrt d’aquel produch. Los dos canals forman lo Canal de las Doas Mars al sens larg; e es per aquò que lo deputat Moudenc demanda a la ministra las rasons per las qualas aquela via es estada exclusa dels trabalhs prèvis. E tanben, vòl saber qualas son las perspectivas economicas qu’a lo govèrn francés a respècte d’aquel grand canal occitan.