Las partidas anar del campionat de XIII s’acaban sus dos resultats logics e sus doas bravas suspresas: Logica respectada amb las victòrias catalanas: aquela dels Dragonets 36-12 fàcia a Vilanòva que tenguèt còp una mièg-temps; la de Pià dimenge que confirmèt sa posicion de cap-de-fila (campion de tardor) amb una larja victòria 60-12, amb 11 ensags a la clau, fàcia a una equipa de Limós amendrida.
 
Primièra suspresa dissabte en fin de vèspre als Minimes. L’ASCarcassona se presentava a Tolosa amb una equipa ont mancava la mitat de l’efectiu de basa (a l’infirmariá). Rampèl es estat fait als joves: juniòrs o gaire titularizats en primièra, coma Alexis Escamilla e Maxime Fages sus las alas, Damian Jaquet en tresena linha, Bastian Canet en segonda linha, Quentin Nicòl (talonaire) e Bastian Escamilla (avant) sul banc!
 
E lo Kiwi Vincent Anderson èra reposicionat en segonda linha en plaça de la dobertura qu’ocupava dempuèi son arribada. Sus doas atacas generalas, Alexis Escamilla, puèi Jeremi Guiraud marcavan e l’arrièr transformava del canton.
 
Tolosa començava ja a pèrdre son rugbí e a tombar paumas. Lo pilar Osea Sadrau traucava la desfensa blava, contornava l’arrièr e resistava al retorn de dos defenseires per marcar, abans de tornar darrièr la linha quauquas minutas puèi, en fòrça aqueste còp. Coma Jeremi Guiraud transformava, los campions menavan 24-0 a la pausa!
 
A la represa, Tolosa ensajèt de reagir mas se confrontèt a una desfensa advèrsa solidària e ermetica. E sus un còp de pè a seguir millimetrat d’Anderson, lo centre Troy Savage puntava lo cinquen ensag audenc. Guiraud ajustava la transformacion e una penalitat per faire bona mesura. Un ensag tolzan a cinc minutas de la fin podiá pas remetre en causa la victòria al tèrme d’una partida plena e enlevada dels Audencs que capitèron pel primièr còp de la sason a jogar just tota la partida: 32-6 al planchòt!
 
Dimenge, al Molin, Lesinhan se presentava sens son mèstre a jogar Wynn, suspendut. Los Verd e Blanc pervenguèron pas a contrar una equipa d’Avinhon dinamica e volontària que prenguèt lo pas dins lo segond temps d’una partida disputada fins a la còrna. A la pausa, Lesinhan menava 14-4 amb tres ensags marcats per Michau (14a), Boudebza (18a) e Poggi (30a), mai una transformacion de Benausse contra un ensag de Wood (9a).
 
Avinhon preniá l’avantage 16-14 mercé a tres ensags de Meads (51a), Arnaud (61a) e Romanò (66a). Benausse egalizva mercé a una penalitat, mas Meads replicava. E a 18-16 pels vesitaires a una minuta de la fin, per conjurar lo sòrt, Lesinhan se voliá pas contentar d’egalizar e causissiá de jogar a la man una penalitat dètz mètres fàcia a las barras!
 
L’alièr Piquemal èra arrestat a 10 centimètres de la linha magica. Una darrièra mesclanha e l’arbitre remandava los Provençals gaujoses delà Ròse e los Lesinhaneses a una sopa de morres sens trufas negras (mercat dissabte de matin 22 a Talairan!) e sens fetge gras!
 
Lo campionat Elita marca una pausa lo temps de las Fèstas. La primièra jornada retorn se tendrà lo dissabte 12 e lo dimenge 13 de genièr.
 
Mas tre la primièra dimenjada de genièr se jogaràn los 1/8ens de finala de la Copa, amb Carcassona-Vilanòva e Lesinhan-Limós coma gròssas afichas.
 
En cadets, dissabte, la formacion de Lengadòc-Roselhon a remportat la Copa Interligas en ganhant 31-18 contra Provença al Barcarés.
 
Dimenge, lso Lengadocians s’interessaràn a la finala de la Copa de la Liga entre formacions de Federala: Vilanòva de Menerbés, sus son terren, ensajarà de prene lo trofèu a l’Ententa Preissan-Lo Lauquet. Aquò promet!




Alan Roch