Mai d’un milion de personas manifestèron dissabte per las carrièras de Santiago de Chile, après una setmana de protèstas e de susmautas contra lo govèrn de Sebastián Piñera. Sonada la "Marcha pus granda de Chile", venguèt la pus frequentada dempuèi lo retorn de la democracia al país, segon La Tercera.
 
Las protèstas comencèron a causa de la quatrena pojada del prètz de la bilheta de mètro en pauques meses, mas cresquèron rapidament fins a denonciar las inegalitata socialas. Environ dètz e nòu personas son mòrtas e n’an detengudas de centenats. L’Institut Nacional dels Dreches Umans (INDH segon la sigla en espanhòl) a recebut de denóncias per d'abuses coma de torturas e vexacions, e lo burèu de la Nauta Comissària de las Nacions Unidas pels Dreches Umans —l’èx-presidenta chilena Michelle Bachelet— a anonciat qu'enviariá doas personas al país per ne far una enquista.
 
L’INDH a actualizat las chifras dels nafrats espitalizats, de detenguts e d’accions judiciàrias entrepresas en las protèstas. I a per ara 997 nafrats, dont 413 per d'armas de fuòc; los detenguts son ja 3162 e s'es entreprés un total de 80 accions judiciàrias, dont 15 per violéncia sexuala.
 
Al començament, Piñera respondèt a las protèstas en declarant l’estat d’emergéncia e de cobrifuòcs —que los a mantenguts—, mas puèi demandèt perdon per sa "manca de vision" e anoncièt una seguida de mesuras per reduire las diferéncias entre chilens. Ça que la, las manifestacions contunhan.
 

Y dijo Salvador Allende: “Mucho más temprano que tarde de nuevo abrirán las grandes alamedas por donde pase el hombre libre...” y hoy en Santiago las alamedas se han abierto y mujeres y hombres libres las recorren en #LaMarchaMasGrandeDeChile
Viva Chile! pic.twitter.com/vhtcBf5qQ6

— epigmenio ibarra (@epigmenioibarra) October 25, 2019