CAPÇALERA PAIS INVISIBLE

Actualitats

InternacionalPoliticaSocietat

Catalonha: grandas manifestacions a Barcelona e cançons en occitan a Brussèlas

La senténcia contra los presonièrs politics catalans, las protèstas consecutivas e la repression brutala de l’estat marcan totjorn l’actualitat en Catalonha e Aran. Aquesta dimenjada, s’es tengut una tièra d’eveniments importants

Mièg milion a Barcelona per la libertat dels presonièrs politics
 
Dissabte passat, Barcelona aculhiguèt una manifestacion nombrosa. Aperaquí mièg milion de personas manifestèron per la libertat dels presonièrs politics e contra la repression de l’estat espanhòl en respondent a la crida de las associacions Òmnium Cutural e l’Assemblada Nacionala Catalana.
 
 
Lèu 50 presonièrs politics
 
“Podèm pas permetre que i aja gaireben cinquanta personas encarceradas e un milièr de perseguidas”, çò diguèt la presidenta de l’ANC, Elisenda Paluzie que citèt un per un los noms dels presonièrs politics catalans, qu’après la darrièra èrsa de repression son ja a l’entorn de cinquanta, del temps que la molonada reclamava lor libertat.
 
De son caire, lo vicepresident d’Òmnium, Marcel Mauri, diguèt que “lo conflicte se resolverà pas amb de jutges e mai de repression policièra”. Dins aquel sens, Mauri precisèt que “fariá de ben a l’estat espanhòl d’escotar lo crit de las carrièras de Catalonha. Los presonièrs politics devon tornar a l’ostal. N’[an] pro de la repression”.
 
 
 
 
Contra la repression policièra
 
En seguida, qualques desenats de milièrs de manifestants s'acampèron davant lo comissariat de la polícia espanhòla per criticar la brutalitat de la repression policièra d’aquestes jorns. La protèsta comencèt pacificament mas s’acabèt amb de susmautas fòrça importantas.
 
 
 
En occitan a Brussèlas
 
Mentretant, aquel dissabte a Brussèlas, l’ANC aviá cridat a divèrses recampaments de solidairitat amb Catalonha per tal de sosténer la manifestacion que se teniá a Barcelona e per denonciar publicament “la brutala repression de l’estat espanhòl”.
 
En seguida, se tenguèt un festenal de musica de solidaritat amb Valtònyc, lo cantador de rap malhorquin en exili. La justícia espanhòla l’a condemnat a la preson per una cançon sul rei Joan Carles Ir. La votz en occitan d’aquel festenal la portèt la cantadora aranesa Alidé Sans.
 
 
 
Contramanifestacion espanholista
 
L’endeman, dimenge, unas 80 000 personas manifestèron per l’unitat d’Espanha e contra lo procès independentista. Los manifestants respondián a la crida de l'associacion antiindependentista Societat Civila Catalana que lo jonguèron los principals representants dels partits espanholistas: PSÒE, PP, C’s e Vox. D’autobuses sortits de tot l’estat espanhòl èran estats naulejats.
 
 
 


abonar los amics de Jornalet

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

francesc palama
5.

Lo qu' aurem d'arribar a veire?, darriera aquesta dreta catalana que vol pas negociar dins la constitucioneta.

  • 2
  • 0
Pitaluga
4.

E per completar lo panorama, "El Periodico", jornal pro PSC (partit "socialista" "catalan"), es a dire unionista, publica uèi un sondatge que la CUP (esquèrra independentista) pòt aver lo doble de deputats que l'inefable Ribera (4 contra 2). A despart d'aquò, pels mèdias de la Macronia, Ribera es representatiu de mièja-Catalonha.
Precision: se calcula per ara que Esquerra republicana e Junts per cat mantendrián lors diputats: 15 e 7 (Publico.es).

Aqueles propagandistas sens vergonha son capables de te dire qu'es nuèch a Miègjorn.

  • 11
  • 0
Serra Gasconha Tolosana
2.

I a un català del Principat (e los responsables del Govern de la Generalitat ) que me pòt explicar perqué la poliça autònomica, los Mossos d'Esquadra, participa a la repression feròça dels patriotas catalans ?

Qui comanda aquelas fòrças de poliça? Quin es lo ròtle del conseller Buch, del MHP Torra, del vice-president Aragonés e del cap dels Mossos Batlle ?


Ieu, soi d'accordi amb la remirabla Presidenta de l'ANC Elisenda Paluzie . Cal qu'aquelas actuacions cessan e exigir la demission del conseller Buch.


Pron de repression e de viòlença dels Mossos e defòra las forças d'occupacion, la Guardia Civil !

  • 9
  • 1
Pitaluga
1.

Los messorguièrs de France radio-télévision:

I. s'espandisson sus 4 pelucres que manifèstan (Sabèm: 1 que lor interèssa de conflar las chifras e de demesir las autras; 2. que prenon pas en compte los autocarris a gratis venguts de fòra Catalonha per conflar la manifestacion; e aquò sens parlar des centenats de mila manifestants de l'autre costat, contra la violéncia policièra);
II. contunhan de presentar la còla fascistoïde de Ribera coma de centre (Ciudadanos s'opausa a totas las recèrcas de fòssas comunas del franquisme);
III. fan pas de comentaris sus los 4 gats que venguèron escotar "Fachito" coma lo nomènan d'unes en Espanha quand los imatges de C Politique mostravan ben qu'èran pas qu'un punhat;
IV dison pas que Ciudadanos s'enfonza mai vite que lo Titanic dins los sondatges (los fascistas de VOX son passats davant) e representa pas grand causa;
V. Parlan d'afrontaments quand, la violéncia es d'en primièr dels policièrs e los manifestants fan pas mai que se defendre, amb, çò que se pòt comprene, la colèra que respond a la colèra;
VI. persistisson a parlar de "dirigents" independentistas quand son lo President, lo Vice-president e la Presidenta del Parlament DEMOCRATICAMENT elegits amb una fòrta majoritat que son en preson o en exili.

Decididament, se meriton pla que lor catem:

"Radio Paris ment..."

  • 10
  • 0

Escriu un comentari sus aqueste article