Divendres passat se clavèt lo nomenat Sinòde d’Amazonia, qu’a fach una revolucion dins la glèisa catolica. Una messa solemna oficiada pel papa Francés metiá lo ponch final a un debat que sas conclusions finalas recomandan que siá possible d’ordenar de capelans maridats qu’ajan una familha e que las femnas pòscan èsser diaconessas. Es probable qu’en genièr venent lo papa confirme las demandas del sinòde.
 
Aquela “revolucion” prevista en principi pels prèires d’Amazonia se poiriá estendre per tot lo Mond, coma o demandèron dissabte los 169 evesques que la votèron. D’efièch, aquò portariá un aleujament a la glèisa catolica qu’es en plena crisi de vocacions sacerdotalas, e mai poiriá dobrir una pòrta a l’abolicion del celibat obligatòri dels prèires.
 
 
Pecat ecologic
 
En mai d’aquò, lo sinòde establiguèt tanben lo concèpte de “pecat ecologic” pels que damatjarián la natura e l’environament, e plaça la glèisa catolica del costat dels pòbles indigènas d’Amazonia per denonciar los atemptats que meton lor subrevivença en perilh.
 
 
Oposicion dels ultraconservators
 
Poiriam dire qu'aquel sinòde es la primièra victòria clara del papa Francés suls sectors ultraconservators de la glèisa catolica qu’avián protestat d’un biais fòrça violent: publiquèron un vidèo ont se vesiá coma raubavan a una glèisa de figurinas amazonianas qu’eles las considèran paganas e que representan la fertilitat de la natura. Aquelas figurinas, qu’un grop d’indigènas amazonianas avián donadas coma present al pontife, las getèron dins Tibre. Ça que la, la polícia las recuperèt e dissabte èran mesas a l'onor a la clavadura del sinòde.
 
Aqueles sectors ultraconservators afortisson que lo papa Francés es un erètge. Francés assegura qu’eles, “pr’amor qu’aiman pas degun, creson qu’aiman Dieu”.