An detengut e mes en gàrdia a vista, pel tresen còp, Alexander Samuel, un jove doctor en biologia de Grassa resident a Niça conegut per far una enquista suls efièches del gas lacrimogèn sus la santat e per son accion coma mètge de carrièras durant las protèstas dels Gilets Jaunes. Es lo tresen còp en mens d’un an que lo plaçan en gàrdia a vista, mas aquesta darrièra detencion es estonanta e quitament inquietanta car l’an mes en gàrdia a vista pendent 48 oras sens que cap de carga siá retenguda contra el, e se cranh que siá perseguit per sas recèrcas medicalas.
 
En març passat, l’avián detengut perque refusèt de se dispersar d’una manifestacion lo jorn que Geneviève Legay foguèt grèvament ferida e en setembre passat l’avián arrestat dins una manifestacion a París en l’acusant d’aver lançat una trotineta sus un policièr. Aqueste darrièr còp, lo detenguèron lo 26 d’octòbre passat mentre qu’anava a un rendètz-vos. Aquel meteis jorn, un grop de personas manifestavan davant una agéncia de la banca Société Générale en respondent a la crida d’Extinction Rebellion, dels Gilets Jaunes e d’Attac. Mentre que Samuel èra ja conegut per la polícia per son activisme, lo detenguèron quand passava davant la banca en question, çò rapòrta Révolution Permanente. D’autras fonts, coma Libération, precisan que Samuel auriá demandat alavetz lor identificacion als policièrs que detenián nòu manifestants.
 
Cossí que siá, Alexander Samuel foguèt plaçat en gàrdia a vista del temps que perquisicionavan son lotjament e emportavan tot son material informatic, sos ordenadors, sas claus USB e tot çò que conteniá d’informacions essencialas sus sas recèrcas a l’entorn dels efièches dels gases lacrimogèns sus la santat. Aquel material restèt qualques jorns en cò de la polícia quand Samuel foguèt liberat sens cap de carga ni explicacion.
 
 
De recèrcas suls efièches dels gases lacrimogèns sus la santat
 
D’unes crenhon qu’aquesta darrièra detencion d’Alexander Samuel siá restacada a sas activitats de recèrca a l’entorn dels efièches dels gases lacrimogèns emplegats per las fòrças de l’òrdre francesas contra los manifestants.
 
Per sas recèrcas, Alexander Samuel aguèt lo sosten de tres mètges e lo consentiment de qualques manifestants que li donèron de mòstras de lor sang. La tòca de son trabalh es de demostrar qu’aquelas personas an patit d’exposicions perilhosas al cianur. De notar que Samuel es tanben perseguit per aver realizat de prelevaments de sang mas ara per ara a pas recebut cap d’instruccion judiciària.
 
 

#SputnikInterview | @Alexand64744343, un biologiste qui enquête sur les conséquences du gaz lacrymogène utilisé lors des manifestations des #Giletsjaunes et a été arrêté, témoigne: https://t.co/MeowCc6xYR@KatiaSputnikpic.twitter.com/4t1YnSPwxl

— Sputnik France (@sputnik_fr) October 30, 2019