Lo govèrn espanhòl poirà talhar l’accès a Internet en de circonstàncias excepcionalas “que pòscan trebolar l’òrdre public, la seguretat publica e la seguretat nacionala”, çò rapòrta eldiario.es. La mesura es compresa dins lo decret de seguretat numerica que lo publiquèt dimars passat lo govèrn de Pedro Sánchez. Es atal que lo primièr ministre a dich que vòl combatre l’independentisme catalan e las estructuras parallèlas que crèa sus Internet e que nomena “republica digitala catalana”. Lo decret es aprovat d’urgéncia en plena campanha electorala de las eleccions que se tendràn dimenge que ven.

Segon aquel decret, l’estat poirà assumir la “gestion dirècta o l’intervencion suls rets e servicis de telecomunicacions electronicas” quand considerarà que son en perilh l’òrdre public o la seguretat estatala. A mai, poirà intervenir sus “quina infrastructura que siá, ressorsa associada o element o nivèl del ret o del servici” que caldrà per restablir l’òrdre e la seguretat.

“Campion de la repression numerica”

La Generalitat de Catalonha a reagit amb chepic. Lo conselhièr de politicas numericas e administracion publica del govèrn catalan, Jordi Puigneró, a declarat “qu’Espanha e China fan una corsa per veire qual es lo campion de la repression numerica” e mai a assolidat que lo govèrn catalan es “fòrça inquiet” per çò qu’aquò se passa en un país de l’Union Europèa.