Lo segond referendum d’independéncia de la Nòva Caledònia se tendrà lo 6 de setembre de 2020, segon la decision del primièr ministre francés, Édouard Phillippe. La data es a mièg camin entre las preferéncias del sector unionista —que voliá far la votacion al pus lèu possible— e l’independentista, que la voliá endarrierar devèrs la fin de l’annada.
 
Lo primièr referendum aguèt luòc lo 4 de novembre de 2018. Ganhèt lo “non” a l'independéncia amb lo 56,4% dels vòtes. Lo resultat foguèt un estonament relatiu, perque se prevesiá una victòria del “non” fòrça pus larga, saique entre lo 60% e 70% dels vòtes.
 
L’Acòrdi de Nouméa permet que, après la tenguda del primièr referendum, un tèrç dels deputats del Congrès de la Nòva Caledònia —lo parlament autonòm d’aquel territòri francés del Pacific— pòscan forçar la convocacion de dos autres vòtes se lo resultat es una victòria del “non”. La primièra data possibla es l’an 2020 e, se torna ganhar lo “non”, se’n poirà far un tresen en 2022.
 
Los partits unionistes considèran qu’en 2020 lo “non” obtendrà una victòria pus clara e que la question de l'independéncia se pausarà pas pus. Al contrari, los independentistas pensan que d’aicí a dètz meses pòdon reduire la distància entre las doas opcions e reüssir la victòria de l’“òc”.
 
 
 
 
 

---

Aquesta nòva es adaptada de Nationalia, amb qui Jornalet ten un acòrdi de cooperacion.