Jornalet vos prepausa, cada jorn a partir del diluns 16 fins al dissabte 21 d'abril, una analisi dels programas electorals dels sièis candidats mai importants a las eleccions presidencialas francesas. Tostemps s'agiràn d'analisis jornalisticas d'un punt de vista nacional occitan e imparcial.
Jean-Luc Mélenchon, candidat del Front d'Esquèrra, es segurament lo candidat revelacion d'aquestas eleccions presidencialas. D'origina socialista, Mélenchon a capitat de bastir una candidatura qu'a amassat un molon de gents al long de tota la campanha electorala. A Occitània, cal remarcar las mai de 30 000 personas qu'assistiguèron al seu meeting de 5 d'abril sus la Plaça del Capitòli de Tolosa. Ara, Jornalet vos prepausa d'analisar un pauc mai prigondament lo seu programa electoral, que la primièra remarca que ne podèm far quand lo legissèm es que s'agís d'un programa plan ideologic. Dins lo programa i trobam mai de reflexion politica e sociala que non pas de proposicions concrètas sul terren. Anem.
SMIC a 1700€ e 35 oras
Lo Front d'Esquèrra sap qu'un dels punts mai atractius del seu programa electoral es la defensa de las classas popularas e obrièras. Amb un discors de tendéncia marxista, Mélenchon a passat la campanha a prometre un fum de cambiaments de tipe social. Una de las proposicions mai repetidas es de far passar l'SMIC a 1700€, aital coma la proposicion de recuperar l'esséncia de las 35 oras setmanalas. Aquestas proposicions se veson acompanhadas per un fòrt discors contra la banca privada, e en favor de las nacionalizacions. Per contra, en legissent lo programa, es vertadièrament complicat de saber cossí Mélenchon e lo Front d'Esquèrra pensan desvolopar aquestas politicas enmièg de la crisi globala. Qual es lo que pagarà la fèsta? Aquò's quicòm que lo programa del FE explica pas.
Una VI Republica parlamentària: lo retorn de la proporcionala
Lo Front d'Esquèrra s'engatja per encetar una assemblea constituenta, que deurà cambiar la constitucion e instaurar la VI Republica en França, que serà parlamentària e non pas presidencialista. En mai d'aquò, Mélenchon s'engatja per restablir la proporcionala a totas las eleccions, quicòm que seriá plan interessant per totes los partits levat lo Partit Socialista e l'UMP, pr'amor que balhariá mai de poder als partit pichòts, qu'actualament veson redusida lor representacion.
Non a la reforma territoriala... mas non al federalisme
Mélenchon s'es engatjat per arrestar la reforma territoriala, aprovada per Sarkozy en 2010, e que fusionarà los departaments e las regions, redusirà lor poder, e crearà de grandas metropòlis, coma París, Lion, Marselha o Tolosa. Çaquelà, lo Front d'Esquèrra es pas brica d'acòrd amb una reforma de la constitucion de caractèr federal. Al contrari, eles penson que sonque un estat fort e centralizat podrà garantir l'egalitat de dreits entre totes los franceses. Aital, dins lo seu programa, i podèm trobar de frasas que fan pensar a una cèrta paur a la descentralizacion, coma "refusarem la mesa en concurréncia dels territòris", o "lo principi general de responsabilitat que l'Estat es lo garant dels ciutadans sus l'ensems del territòri deurà èsser reafirmat e consolidat".
Lengas e culturas regionalas
Lo Front d'Esquèrra se caracteriza pas per aver un posicionament de sosten absolut a las lengas e culturas regionalas. E aquò se vei dins lo programa de Mélenchon. La siá idèia d'una França uniformizada, ont totes los ciutadans ajan los meteisses dreits e obligacions e parlen la meteissa lenga, se pòt plan palpar pr'amor que dins tot lo programa i a pas cap de referéncia a aquesta question. Zèro. Quitament pas quand se parla de cultura. Çaquelà, òc qu'i trobam de referéncias a l'importància de desvolopar la lenga francesa e de l'espandir internacionalament, a travèrs de las Alianças Francesas, los Licèus franceses, etc.
N'i a pro de l'OTAN
Una de las proposicions mai radicalas en matèria de politica internacionala es la sortida de França de l'OTAN. Mélenchon tanben prepausa fòrça cambiaments dins l'ONU. Per exemple, prepausa la creacion d'un Tribunal Internacional de justícia climatica, que deurà garantir de perseguir los delictes ecologics dins lo mond sencer.
Marçal Girbau per Jornalet
Marçal Girbau per Jornalet
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#4 Pèir, as rason de precisar qu'es lo PC que i es favorable, non pas lo FdG tot.
Veire, per exemple, lo debat al Senat quand s'i parlèt de signar la "Charte européenne des langues régionales ou minoritaires" :
http://www.senat.fr/cra/s20080513/s20080513_4.html
Extrach :
[...] M. Gérard Le Cam. (...) Dans le même élan, j'appelle à soutenir notre belle langue française et nos belles langues régionales. (Applaudissements à gauche, à l'exception de M. Mélenchon) [...]
Aqueth vielh gahús jacobin que s'a trobada era plaça, tè, que benificia dera dinamica militanta deth Partit Comunista e dera sua experiença e que'us serveish de cap carismatic de qui n'an pas mes dempuish Marchais ! Senon eth vueit sus era question deras lencas regionaus en progama? Qu'ei pormor en Partit Comunista que i son mesdàvit favorable e en Partit d'Esquèra mesdàvit contra, ath contrari deths Trotsquistas de LO e deth NPA que no's botan pas d'acòrd tà aver un candidat unic per brotilhas estratgic, eth Partit d'Esquèra e eth Partit Comunista qu'an mes d'oposicion ideologicas que las preferan escobar devath eth tapís en demorar de véger !
Lo seu probèma, amb las lengas dichas regionalas, es que lo Front d'esquèrra es per e qu'el es contra. E se torceja coma un lusèrp per far creire lo contrari !
Cercavi un qualificatiu per l'istrion d'esquèrra, e es un jornalista estrangièr qu'emplèga, çò sembla, lo mai pertinent. Per explicar lo succès de sa campanha -succès limitat, siaguèm serioses- ditz aquel òme avisat qu'agrada perdeque es "franchouillard". Ara, tremolatz sociotraites! Aquel tipe qu'invòca Robespierre porriá ésser un còpacap per Hollande!
La vielha esquèrra, òc... E s'agissent de las lengas ditas regionalas, es sustot la vielha estreita...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari