Lo prince saudian Al Walid recebrà lèu a Tolosa l’A380 que comandèt en 2007. Un grand obrador se metèt en marcha per ne far un palais volant.
Dins qualques meses, l’A380 serà liurat al prince Al Walid. L’aparelh, que s’aprèsta a Tolosa, serà l’avion civil mai grand del Mond. Lo prince saudian lo comandèt dins lo salon aeronautic de Dubai en 2007 amb la tòca de lo far venir un palais volant. Al Walid a ja un Boeing 747, qu’èra l’avion mai grand del Mond abans l’espelida de l’Airbus A380.
Segon d’informacions de La Dépêche, Airbus poiriá liurar lèu l’avion al prince Al Walid. D’après aquel jornal occitan en francés, de fotografs especializats en aeronautica son arribats de fotografiar aquel A380, qu’a l’ora d’ara seriá dins l’usina Jean-Luc Lagardère en esperant un liurament imminent.
Dins l’avion, lo prince saudian a exigit un garatge per sa Rolls Royce e un ascensor per connectar aquel pargatge amb los estancis superiors. Al delà, los convidats del prince auràn una sala de conferéncias e una sala de taulejadas mentre qu’Al Walid aurà una estança reiala de cinc membres e una sala de pregària amb de tapisses de prèc orientats automaticament vers La Mèca.
Lo prince a crompat aquel avion per 485 milions de dolars, qu’i cal apondre 50 milions de mai per la disposicion interiora.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari