La repression policièra a las protèstas pròdemocracia a passat l’òsca en tirant de balas realas suls manifestants e en descadenant lo caos. Almens tres manifestants son estats ferits per las balas, dont un gojat de 21 ans, qu’es espitalizat per una intervencion cirurgicala a l’arnelh e al fètge. Un acamp de protèsta s’es tengut davant l’espital. Segon las darrièras infromacions, un autre manifestant nafrat se trobariá tanben en estat fòrça grèu.
 
La polícia d’Hong Kong a confirmat qu'aviá emplegat de balas realas. Pasmens a desmentit d’aver recebut d’òrdres de durcir la repression après la vesita que la faguèt a Pequin la cap del govèrn d’Hong Kong, Carrie Lam, la setmana passada.
 
Mentretant, los manifestants an lançat una crida a totes los estudiants internacionals de l’Universitat Chinesa d’Hong Kong per tal qu’apèlen immediatament lors consulats.
 
Aquesta es la vint e tresena setmana de protèstas a Hong Kong, que manten un braç de fèrre amb las autoritats localas e China per obténer de reformas democraticas, e la mòrt d’un jove de 22 ans dins l’encastre d’una protèsta a suscitat la colèra dels manifestants. Lo jovenòme tombèt de qualques estancis d’un apartament e los manifestants n’acusan la polícia, mas la polícia ditz qu’a pas res a veire amb aquel decès.