L’Institut d’Estudis Occitans finança parcialament lo viatge anar-retorn de Marselha a París en TGV dels manifestants del 30 de novembre, çò rapòrta Aquò d’Aquí. L’IEO de Provença ajudarà a pagar lo prètz de las bilhetas als manifestants que partiràn de Provença a la manifestacion per las lengas autoctònas e minorizadas de l’estat francés. L’Associacion per l’Ensenhament de la Lenga d’Òc (AELÒC) e lo Centre Regional dels Ensenhaires d’Occitan de Provença (CRÈO) se son associats a l’iniciativa.
 
Los participants pagaràn pas mai de 30 èuros per la bilheta del TGV e la rèsta serà presa en carga per l’IEO, l’AELÒC e lo CRÈO Provença. Es atal que l’occitanisme provençal vòl far remarcar l’importància de defendre l’ensenhament de l’occitan dins las Acadèmias d’Ais-Marselha e Niça. Las acadèmias son las subdivisions escolaras, onze d’elas pertòcan Occitània dins l’estat francés.
 
Lo mond que poiràn pas anar a la manifestacion son pregats de far un don per ajudar a finançar los viatges dels militants en mandant de chècs a l’IEO-CRÈO / Ostau de Provença / 8bis Avenguda Jules Ferry / 13100 Ais de Provença.
 
 
D’autobuses
 
Dins la rèsta d’Occitània, la FÈLCO e los diferents collectius per l’ensenhament de l’occitan (CRÈO) dins las divèrsas circonscripcions escolaras sonadas acadèmias apèlan totes los ensenhaires d’occitan a i participar. Los diferents CRÈO son a organizar d’autobuses.
 
La manifestacion èra prevista pel 16 de novembre mas fin finala l’an reportada al 30 en rason de l’anniversari del movement dels Gilets Jaunes.
 
 
Un grand recampament es previst
 
Aquel grand recampament es previst a 11h davant lo ministèri dich de l’Educacion Nacionala, a París, e se tendrà en seguida de la crida qu’an facha diferents collectius d’ensenhaires de las lengas autoctònas perseguidas per las politicas lingüicidas de l’estat, dont l’occitan. Se planh la granda reculada dels escassas ressorsas que i aviá dins l’educacion publica francesa après la reforma del ministre Blanquer.
 
L’occitan, qu’èra ja una matèria facultativa dins los licèus, patís amb aquela reforma la concurréncia dirècta amb d’autras opcions, e es als caps d’establiment de decidir s’es ensenhat o pas. E mai patís una minorizacion del coeficient pel bachelierat, çò que daissa en desavantatge los escolans que causirián d’aprene la lenga del país, mentre que las lengas classicas, lo latin e lo grèc ancian, son al contrari sostengudas en adusent mai de ponches als candidats.
 
 
Una situacion fòrça grèva
 
De fach, se tracta d’una situacion fòrça grèva per l’occitan. Solament dins l’acadèmia de Tolosa, an mes fin a la dotacion especifica que finança la lenga nòstra dins los collègis e licèus, çò qu'a daissat sens occitan gaireben 15 000 escolans e una cinquantena d’ensenhaires.
 
Dins la rèsta d’Occitània administrada per França, la situacion es pas melhora. Dins las acadèmias de Lemòtges, Clarmont e Grenòble, l’occitan dins los licèus e collègis es anecdotic. A Montpelhièr e Ais, l’occitan a fòrça reculat davant las atacas dels diferents rectors. D’anóncias de barraduras son estadas fachas en Provença ont lo rector se trufa “d’una lenga que se parla pas”. L’explicacion de la fin de l’occitan es lo pretèxt de la reforma Blanquer dels licèus. Lo 60% dels escolans del segondari es dins l’acadèmia de Tolosa. L’occitan es tanben fòrt a Niça, mas patís fòrça la reforma mortifèra dels licèus. La vertat es que i a una volontat evidenta de metre fin a l’occitan al Ministèri parisenc de l’Educacion.