Mai d’un milièr de detenguts e la barradura de l’accès a internet, vaquí lo bilanç de las protèstas qu’a viscudas Iran aquesta dimenjada contra la pojada del prètz dels carburants e lo racionament de la gasolina.
 
Lo govèrn del país anoncièt divendres que lo prètz d’un litre de gasolina regular aviá aumentat de 15 000 rials (aperaquí 0,32 èuros) e que se fixariá una racion de 60 litres per mes per cada automobila privada.
 
Lo cap suprèm del país, l’aiatollà Ali Khamenei a manifestat publicament son sosten a la mesura e a acusat los opausants de “sabotatge”. Segon el, “la contrarevolucion e los enemics d’Iran an totjorn sostengut lo sabotatge e las violacions de la seguretat”.
 
Segon Netblocks, un servici que susvelha la libertat d’Internet, gaireben tot lo país èra dissabte de ser sens accès al ret.
 
Abans la casuda d’Internet, circulavan suls rets socials de vidèos que mostravan de policièrs antisusmautas a atacar los manifestants amb de matracas e de gases lacrimogèns, e de manifestants a barrar d’estradas e a alucar de fuòcs per las carrièras de Teheran e d’autras vilas. Aqueles vidèos an pas pogut èsser verificats per de fonts independentas.
 
Las autoritats iranianas aurián paur que se repetiscan las susmautas de 2017, quand esclatèron de protèstas dins tot lo país contra la pauretat que causèron 22 mòrts, segon de donadas del govèrn.