Amazonia es arribada a son nivèl maximal de desforestacion dels darrièrs dètz ans. Entre agost de 2018 e julhet de 2019 se perdèron gaireben 10 000 km² de superfícia forestièra, çò es un 29% de mai que dins l’annada precedenta. Aquela donada es estada obtenguda a travèrs dels imatges preses amb de satellits, e l’a publicada l’Institut Nacional de Recèrcas Espacialas. Aquel organisme estatal a confirmat atal que las politicas antienvironamentalistas anonciadas per Bolsonaro son a se menar a bon tèrme.
 
Lo quite ministre de l’environament brasilièr a reconegut qu’aquelas donadas son inquietantas e a anonciat que metriá en òbra de nòvas estrategias per combatre lo desboscament, lo sector minièr e las apropriacions illegalas de tèrras. Per o far, anoncièt que uèi rescontrariá los governadors dels estats d'Amazonia, e mai afirmèt que poiriá mandar l’armada amb la tòca d’i entamenar d’operacions environamentalas.
 
Fa qualques meses, lo quite ministre aviá mesestimat las primièras donadas en afirmant qu’èran pas fisablas, e quitament lo president Jair Bolsonaro licencièt lo director de l’Institut Nacional de Recèrcas Espacialas.
 
Ara, las donadas presentadas aqueste diluns passat comprenon sèt meses del mandat de Bolsonaro e cinc meses del govèrn precedent, mas comptan pas los grands incendis que i aguèt a partir del mes d’agost, qu’aurián provocat, entre agost e octòbre, una destruccion de 4000 km² de forèst. Aquò es environ lo doble de territòri perdut que dins lo meteis periòde arunan. Segon las organizacions environamentalistas, los ans avenidors seràn pus desastroses car lo govèrn de Bolsonaro poiriá permetre l’agricultura comerciala dins las resèrvas dels pòbles originaris.
 
A mai, lo prètz de la carn en Brasil es arribat a son maxim istoric. Aquò pòt far aumentar l’ocupacion illegala de las tèrras pels elevaires, çò qu’es una de las principalas causas de la desforestacion.