Se presentèt ièr a Marselha Totèm Sismic, lo primièr disc de Polifonic System que prepausa una reïnterpretacion actuala, fresca, viva e modèrna dels balètis tradicionals occitans.
 
Lo disc arriba après cinc ans de trabalh de la magnifica còla compausada pel musicològ marselhés Manu Théron, lo beat-boxer Ange B, lo musician arlatenc Henri Maquet e lo cevenòl Clément Gauthier. Produch a Marselha per la companhiá del Lamparo, lo disc es publicat amb lo labèl Buda Musique. Lo disc es acompanhat d'un libret illustrat  que tanben conten las paraulas.
 
“Es un projècte bèu perque es de dança, un projècte de balèti inspirat dei danças tradicionalas mai amb l’electronica se pòt dançar çò que vòs”, çò nos contava Théron fa qualques meses a la redaccion de Jornalet. E mai precisava: “Èra pas lo projècte mai important de ges de nosautres, es un projècte un pauc periferic, e doncas avèm fach un dotzenau o un quinzenau de concèrts cada an e après cinc ans avèm decidit de faire un disc”.
 
Lo disc l’enregistrèron en 2007 mas esperavan que i auriá mai de mejans e l’an sortit tanlèu plan alestit. Conten totas las cançons que Polifonic System canta abitualament sus l’empont mas tanben de cançons nòvas. “Per sortir lo nòu disc farem una fèsta e una virada per tota Occitània, per faire escotar aquò ai gents”, çò precisava Théron.
 
A Tolosa, la fèsta de presentacion es prevista dissabte 30 de novembre a La Topina.

 
 




 

Manu Therón qu’ei un musician e compositor plan coneishut que dirigís era companhia deth Lamparo en Marselha. Qu'a viatjat pertot en Euròpa coma musicològ, e que propòse un repertòri comun de Porto enquia Sicília damb eth sòn grop Chin Na Na Poun. pic.twitter.com/KgpMNn5FYB

— EthLigamOccitan (@ethligamoc) November 20, 2019