Los defensors de la subrevivéncia de l’occitan manifèstan uèi a París amb los alsacians, arpitans, bascos, bretons, catalans, còrses e flamencs. Son los diferents collectius d’ensenhaires de las lengas autoctònas perseguidas per las politicas lingüicidas de l’estat, dont la lenga nòstra, que deploran la granda reculada dels escassas ressorsas que las avián dins l’educacion publica francesa après la reforma del ministre Blanquer. Organizats dins un collectiu nomenat Per Que Viscan Nòstras Lengas, aquel grand recampament se ten a partir d’11h davant lo ministèri dich de l’Educacion Nacionala.
 
Per Occitània, la FÈLCO e los diferents collectius per l’ensenhament de l’occitan (CRÈO) dins las divèrsas circonscripcions escolaras sonadas acadèmias an apelat totes los ensenhaires d’occitan a i participar. La protèsta ten lo supòrt majoritari de l’occitanisme, mai que mai de Calandreta e de l’Institut d’Estudis Occitans.
 
Lo collectiu Per Que Viscan Nòstras Lengas  a aviat una peticion sus change.org adreiçada al ministre francés de l’educacion per protestar contra sa reforma que met grèvament en perilh las lengas autoctònas autras que lo francés.
 
Los signataris planhon lo nivèl de feblesa qu’an atench aquelas lengas, e asseguran que lor subrevivéncia es en question. Tanben soslinhan l’esfòrç màger que devon far las populacions concernidas per salvagardar aquel patrimòni lingüistic e cultural. A mai, denóncian las successivas politicas lingüicidas de l’estat francés e soslinhan qu’a l’ora d’ara existís cap de volontat reala de metre en plaça de vertadièras politicas lingüisticas eficaças.
 
La situacion de l’ensenhament es essencial a la transmission e a la vitalitat d’aquelas lengas, e per tant, se condemna la reforma Blanquer e sas “consequéncias terriblas”, que se demòstran amb la “casuda dramatica dels efectius d’escolans inscriches en lengas regionalas”.
 
Lo collectiu se bat per l’ensenhament de l’occitan, del basco, del breton, del catalan, del còrs, del flamenc, de l’alemand local, de l’arpitan, de las lengas d’oïl, dels creòls e de las lengas autoctònas dels territòris d’otramar. Apèlan a la mobilizacion generala contra lo ministre Blanquer dont la politica mena a un vertadièr lingüicidi.