S'estend l'èrsa de protèstas socialas en America latina. En Colómbia, de centenats de milièrs de personas manifestèron dijòus passat per las carrièras de las principalas vilas del país per mostrar lor refús de las politicas economicas e socialas del president conservator Iván Duque.
 
La jornada comencèt amb de manifestacions pacificas e se perlonguèron fins a la nuèch amb una granda sonariá de caçairòlas. Cèrts actes de vandalisme, mai que mai a Bogotà e Cali, justifiquèron un cobrifuòc de part de las autoritats localas.
 
Se tenguèt una cauma generala coma responsa a las mesuras economicas que, segon los sindicats, lo govèrn de Duque vòl prepausar al Congrès per modificar lo regim del trabalh e las pensions de retirada al detriment dels obrièrs.
 
A Bogotà, de desenas de milièrs de personas, d’estudiants, de trabalhadors, d’indigènas e de collectius negres empliguèron la Plaça de Bolívar, lo centre del poder politic e judicial de Colómbia, amb de messatges coma "lo govèrn investís pas dins l’educacion de paur de l’emancipacion" o "mai de salaris, mens d'impòstes".
 
La manifestacion a Medellín, que foguèt majoritàriament pacifica malgrat d'afrontaments entre de manifestants encagolats e de policièrs, aguèt coma ponch d'amassada lo Pargue de las Luses. A aquela protèsta participèron un grop d’ex-combatents de las FARC que se dobriguèron a l’acòrdi de patz, que dimenge venent aurà tres ans.
 
Un d’aquestes èra Rodrigo Londoño, conegut coma Timonchenko. El ara es president del partit Fòrça Alternativa Revolucionària del Comun (FARC), sorgit de la desmobilizacion de l’anciana guerrilha, que participèt environat de gardacòrses. "Sèm a acantonar los que vòlon que contunhem la guèrra (…) ieu espèri qu'escotaràn lo pòble, ai l’esperança que rasonen e escoten la votz del pòble, lo pòble demanda la patz e demanda la reconciliacion", çò diguèt als jornalistas.