Mai de seissanta mètges an mandat una letra a la ministra de l’Interior britanica, Priti Patel, per l’avertir que la santat del fondador de WikiLeaks, Julian Assange, es tant inquietanta que poiriá morir en preson se recep pas de suènhs medicals urgents. Segon The Guardian, los doctors demandan que quite sul pic la preson de Belmarsh, ont es embarrat dempuèi que l’Eqüator li retirèt l’asil politic, e que siá menat dins un espital. La letra la signan de mètges dels Estats Units, d’Austràlia, del Reialme Unit, de Suècia, d’Itàlia, d’Alemanha, d’Sri Lanka e de Polonha.
 
Aquela letra se basa sus un rapòrt publicat lo 21 d’octòbre passat pel raportaire de l’ÒNU sus las torturas, Nils Melzer, qu’avertissiá que “l’exposicion continua a una procedura arbitrària e als abuses li poiriá costar lèu la vida”.
 
“Assange a de besonh d’assisténcia medicala urgenta tant a causa de sa santat fisica coma psicologica”, çò avertisson los mètges signataris de la letra. Aquela assisténcia, çò dison, se pòt pas far en preson, mas Assange la deu aver dins un espital amb de tecnologia universitària dirigida per de personal expèrt e esquipat. “S’aquela assisténcia e aquel tractament se fan pas d’un biais urgent, avèm una inquietud fondamentada, basada sus de pròvas, qu’Assange poiriá morir en preson. La situacion medicala es urgenta, se pòt pas pèrdre de temps”, çò avertisson.
 
Amb la darrièra aparicion publica d’Assange, quand foguèt arrestat dins l’ambaissada de l’Eqüator, se vegèt ben que sa santat èra fragila. En mai d’aquò, quand faguèt una declaracion davant los jutges a Londres fa un mes, li costava de se recordar de sa data de naissença e a la fin de la sesilha diguèt a la jutgessa que compreniá pas çò que s’èra passat, çò precisa The Guardian.
 
 
Lo procès per l’extradicion serà en febrièr
 
A l’ora d’ara, Assange es a l’espèra que se faga lo jutjament per son extradicion als Estats Units, previst pel 24 de febrièr de 2020. La justícia dels Estats Units l’acusa d’aver conspirat amb l’èx-analista d’intelligéncia militara Chelsea Manning per aver revelat de material classat l’an 2010 e demanda per Assange una pena de 175 ans de preson.
 
En junh de 2012, de paur qu’una extradicion devèrs Suècia per una acusacion de viòl dobriguèsse la pòrta a una extradicion devèrs los Estats Units, Assange se refugièt dins l’ambaissada de l’Eqüator a Londres, en transgressant las condicions de la libertat condicionala. L’11 d’abril passat, totun, lo govèrn eqüatorian de Lenín Moreno li levèt l’asil politic, çò que permetèt que foguèsse detengut e condemnat per aver fugit la justícia anglesa. La setmana passada, lo ministèri public suedés retirèt la denóncia per viòl.
 
Lo 22 de setembre, compliguèt la pena de cinquanta setmanas a la quala èra estat condemnat, mas lo tenon totjorn en preson a causa del procès d’extradicion. Los Estats Units an sollicitat l’extradicion d’Assange en vertut de dètz e uèch acusacions, totas restacadas amb la difusion d’informacion secreta mejançant WikiLeaks.