La reforma Blanquer “es un veritable lingüicidi, amb los metòdes d’un totalitarisme”. Atal la definiguèt diluns passat l’eurodeputat còrs François Alfonsi dins sa vesita a Ais de Provença. Alfonsi vesitèt la vila provençala dins l’encastre d’un acte per encoratjar lo mond a participar a la manifestacion de dissabte venent a París, segon la crida que l’a facha lo collectiu Per Que Viscan Nòstras Lengas. “L’estat crèa una agregacion de lengas regionalas, mentre que redutz a ren lo coeficient d’aquestei au bachelierat”, çò diguèt de son caire lo baile dels joves del Felibritge, Paulin Reynard, çò rapòrta Aquò d’Aquí.
 
“Blanquer prepausa un enterrament e s’estona que volgam pas morir”, çò diguèt Alfonsi, qu’èra convencut que la manifestacion de dissabte seriá “fondadora d’un movement pròpri a far recular lo ministre, malgrat lo rotlèu compressor del jacobinisme, que suportam pas”. Dins aquel sens, Alfonsi ramentèt qu’Euròpa es pas ostila a la diversitat de las lengas, a la diferéncia de França, e que tot aquela riquesa lingüistica es un patrimòni europèu e non pas unicament francés. “Sèm en Euròpa, ont la diversitat es possibla, s'es pas valorizada, e nòstras lengas apartenon a Euròpa, França a pas de destruire aquel patrimòni europèu”.
 

Conf de presse à l’Oustau Provenço Aix en Pce avec les acteurs langue d’oc pour dénoncer le linguicide de l’Education Nale contre les langues régionales. Tous à Paris samedi 30/11. Sus au Ministère rue de Grenelle. Contre la réforme Blanquer. ⁦@RetPS⁩ ⁦@Paul_Molac⁩ pic.twitter.com/ibcgTiImZG

— François Alfonsi (@F_Alfonsi) November 26, 2019

Per que viscan nòstras lengas
 
Dissabte que ven a París manifestaràn los defensors de la subrevivéncia de l’occitan amb los alsacians, arpitans, bascos, bretons, catalans, còrses e flamencs. Las diferentas associacions d’ensenhaires de las lengas autoctònas perseguidas per las politicas lingüicidas de l’estat deploran la granda reculada dels escassas ressorsas que las avián dins l’educacion publica francesa après la reforma del ministre Blanquer. Organizat dins un collectiu sonat Per Que Viscan Nòstras Lengas, aquel grand recampament se ten a partir d’11h davant lo ministèri dich de l’Educacion Nacionala.
 
Per Occitània, la FÈLCO e los diferents collectius per l’ensenhament de l’occitan (CRÈO) dins las divèrsas circonscripcions escolaras sonadas acadèmias an apelat totes los ensenhaires d’occitan a i participar. La protèsta ten lo supòrt majoritari de l’occitanisme, mai que mai de Calandreta e de l’Institut d’Estudis Occitans.
 
Lo collectiu Per Que Viscan Nòstras Lengas a aviat una peticion sus change.org adreiçada al ministre francés de l’educacion per protestar contra sa reforma que met grèvament en perilh las lengas autoctònas autras que lo francés.


Los signataris planhon lo nivèl de feblesa qu’an atench aquelas lengas, e asseguran que lor subrevivéncia es en question. Tanben soslinhan l’esfòrç màger que devon far las populacions concernidas per salvagardar aquel patrimòni lingüistic e cultural. A mai, denóncian las successivas politicas lingüicidas de l’estat francés e soslinhan qu’a l’ora d’ara existís pas cap de volontat reala de metre en plaça de vertadièras politicas lingüisticas eficaças.
 
La situacion de l’ensenhament es essencial a la transmission e a la vitalitat d’aquelas lengas, e per tant, se condemna la reforma Blanquer e sas “consequéncias terriblas”, que se demòstran amb la “casuda dramatica dels efectius d’escolans inscriches en lengas regionalas”.


Lo collectiu se bat per l’ensenhament de l’occitan, del basco, del breton, del catalan, del còrs, del flamenc, de l’alemand local, de l’arpitan, de las lengas d’oïl, dels creòls e de las lengas autoctònas dels territòris d’otramar. Cridan a la mobilizacion generala contra lo ministre Blanquer dont la politica mena a un vertadièr lingüicidi.