Dos satellits de la NASA se son esclafats contra la Luna, un impacte que los engenhaires de l’agéncia espaciala estatsunidenca an recebut amb d’aplaudiments. S’agís de la culminacion de la mission menada a tèrme pels satellits pendent los darrièrs meses.

Los dos satellits bessons, nomenats Ebb e Flow, an fach impacte sus una montanha près del Pòl Nòrd de la Luna. L’endrech es nomenat Sally Ride, en omenatge a la primièra femna nòrd-americana astronauta, que moriguèt en julhet passat dins sos 61 ans, victima d’un càncer.
 
Lo 14 de decembre passat, los dos satellits recebèron l’òrdre de començar la descenduda per far impacte sus la Luna. En una manòbra amb fòrça precision, cinquanta minutas abans la collision, los dos aparelhs aluquèron los motors fins a agotar lo combustible.
 
Pendent lor mission, que comencèt en setembre de 2011, los satellits an fach mai de 115 000 fotografias de la Luna e, amb lors donadas, los scientifics asseguran qu’auràn la mapa gravitatòria mai completa de l’astre. Al delà, amb l’impacte dels satellits, la NASA espèra de reculhir encara mai d’informacions de la superfícia lunara.