Environ 1500 marselheses manifestèron dimenge passat per se recordar de Zineb Redouane, que moriguèt ara fa un an a causa d’una granada lacrimogèna tirada per la polícia. Aviá 80 ans. Los manifestants cantavan "Siam totei d’enfants de Zineb" e "Zineb oblidem pas, perdonam pas", çò rapòrta La Provence.
 
Zineb Redouane èra una marselhesa d’origina argeriana. Lo 1r de decembre de 2018, una granada lacrimogèna li tustèt la cara mentre qu’ela barrava los contravents de son apartament, al 4n estatge d’un immòble près de la Canebiera. Foguèt ferida e la menèron a l’espital de la Timona e puèi al de la Concepcion, ont moriguèt l’endeman, dimenge 2 de decembre, dins una intervencion cirurgicala.
 
La polícia èra a reprimir d’incidents qu’avián esclatat en fin de jornada sul Pòrt Vielh de Marselha e puèi sus la Canebiera, après una jornada marcada per mai d’una manifestacion a l’apèl dels Gilets Jaunes e tanben del collectiu nascut après la mòrt d’8 personas dins l’escrancament de dos immòbles dins lo quartièr de las Noalhas.