capçalera campanha

Actualitats

PoliticaInternacional

Islàndia s’es prononciada en favor d’una Escòcia independenta

Lo president del país a dich que “l’independéncia es pas brica una calamitat, e que pòt èsser lo camin cap a la prosperitat e una bona societat”

Lo president islandés, Ólafur Grímsson, es intrat dins lo debat sus l’independéncia d’Escòcia. En una entrevista qu’emetrà lèu la BBC, exprimís sa satisfaccion qu’Escòcia venga independenta al referendum de 2014. Grímsson o justifica en disent que los pichons païses independentes del nòrd d’Euròpa se pòrtan plan, e apond que “l’independéncia es pas brica una calamitat” e que “poiriá èsser lo camin cap a la prosperitat e una bona societat”.


Dins una entrevista que s’emetrà la setmana que ven dins lo programa Newsnight, lo president mai veteran d’Islàndia, en carga dempuèi 1996, ditz que son país es environat per de nacions capitadas e petitas dins la Mar del Nòrd, ont las causas se fan relativament plan. “S’òm pren una perspectiva de cent ans, l’istòria del nòrd d’Euròpa mòstra que los païses son anats en se fasent independents a cha un.”
 
“La decision qu’Escòcia seguisca aquela rota, la devon prene los escoceses”, çò apond.
 
Islàndia es un país pionièr en la reconeissença de nòus estats independents. Es estat lo primièr estat a reconéisser diplomaticament Lituània, Letònia, Estònia, Azerbaitjan, Georgia, Armenia, Croàcia e Montenegro. E es estat tanben lo primièr estat non musulman a reconéisser l’independéncia de Palestina.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Maime Limòtges
5.

#4 Me sembla qu'ai una definicion comuna. Prene la dau cantalausa per exemple : "sobeiranetat politica après ocupacion o colonizacion." E finalament, si en Africa o en América dau Sud n'i a daus intervencions exteriors mai o mins visiblas, qu'es ben perque n'i a un pauc de sobeiranetat (de l'Estat, parlem pas daus pòples). L'independencia es nonmàs un chamnhament juridic (e simbolic de segur), es pas una garantida de democracia o de progrès.

Te pòde pas dire a l'avança si la situacion de l'Escòcia sirà melhor après l'independéncia qu'avant. Quand vese los pitits pais independents en Euròpa, de segur, sei de consent coma lo president islandés. Es pas una calamitat e pòt (pòt !) èsser un chamin vers la prosperitat. Mas la decision es la daus escosès e me sembla fòrça important qu'aia un referendum (e mai en Catalonha). Perque me sembla important qu'un pòple que vòu èsser independent iò sia.

  • 2
  • 0
Batko
4.

#3 Quan parli d'independéncia, parli de la vertadièra e non pas de la Françafrica. O lavetz ne parlam pas de la medisha causa, o atz ua nocion d'independéncia diferenta.

  • 2
  • 0
Maime Limòtges
3.

#2 ah bon ? Iò fau dire aus africans ten ! :-D

  • 0
  • 1
Batko
2.

Mei d'independéncia = mei de democracia, qu'ei matematic.

  • 5
  • 0
Terric Lausa Quilhan
1.

Aquesta posicion islandesa es normala. Islàndia, un país que coneissi plan, venguèt independenta sonque en 1944 dins l'encastre d'un procès democratic (aprèp qualques sègles d'oscuritat totun).

Es un país qu'a sabut lutar en permanéncia e lo biais recentament trapat pels islandeses per sortir de la vergonhosa crisi financièra e castigar los indignes responsables ne son la pròva.

Ara lo país ten la volontat de dintrar dins lo malhum diplomatic mondial amb una vision alternativa ultra-umanista e ultra democratica.

Doblidarem pas qu'es una de las nacions qu'inventèt lo parlamentarisme, amb Catalonha, Occitània e Anglatèrra.

  • 4
  • 0

Escriu un comentari sus aqueste article