L’organizacion umanitària Egalitat Animal a enregistrat amb de drònes d’imatges inedits de la desforestacion d’Amazonia, que demòstran que “l’aument de la desforestacion de la selva amazoniana es restacat amb l’elevatge”. Entre d’autras causas se pòt veire mai d’un milièr de camions “que transportavan de sòja”.
 
Segon l’Observatòri de la Complexitat Economica, Brasil es lo pus gran exportator mondial de sòja, en contrarotlant lo 45% de las vendas (los Estats Units n’an lo 38%). A mai, segon Egalitat Animal, lo 79% de la sòja que se produtz dins lo Mond s’emplega per l’alimentacion de l’elevatge.
 
L’airal filmat es la region de Pará, que foguèt una de las mai afectadas aqueste estiu pels incendis qu’an devastat ongan la region. De soslinhar que los incendis en Amazonia an crescut ongan d’un 83% per rapòrt a los de l’an passat. La majoritat d’aqueles incendis los provòcan de grands entrepreneires agricòlas, l’indústria dels biocarburants e las societats minièras, que desforèstan la zòna per l’esplechar. E mai fins ara foguèsson illegals, tre que Bolsonaro venguèt president de Brasil promoguèt l’esplecha d’Amazonia per l’agricultura, l’elevatge e las minas.