Lo conservator Boris Jonhson a ganhat amplament las eleccions  generalas al Reialme Unit. Lo primièr ministre a atencha una majoritat absoluda de 365 representants dins la Cambra de las Comunas, e la legitimitat de complir lo Brexit abans lo 31 de genièr. Una victòria tala, los diches Tories la coneissián pas dempuèi 1987 quand Margaret Thatcher ganhèt pel darrièr còp las eleccions.
 
Lo grand vencut es lo de cap l’oposicion, Jeremy Corbyn, qu’a perduts seissanta deputats e a daissats los trabalhistas amb lo pièger resultat en mai de quaranta ans, amb solament 202 deputats. Corbyn a assegurat que la polarizacion que l’a causada lo Brexit a fach tòrt a son partit. En mai d’aquò, lo lidèr del Labour a anonciat que seriá pas pus lo cap dels trabalhistas a las eleccions venentas.
 
 
D’eleccions marcadas pel Brexit
 
Boris Johnson avancèt las eleccions après pèrdre sa majoritat dins la Cambra dels Comuns, çò que li permetiá pas de far aprovar son idèa de sortida de l’Union Europèa. Lo primièr ministre, qu’assumiguèt la carga après la demission de Theresa May, demandèt als electors una majoritat per complir lo Brexit e metre fin al blocatge.
 
De mai, a comptat sul sosten del Partit del Brexit de Nigel Farage, que s’es pas presentat dins las zònas ont se presentavan los candidats de Johnson, en favorissent que los conservators ganhèsson de deputats dins un sistèma electoral majoritari d’un torn que gratifica lo candidat en tèsta dins cada circonscripcion.
 
Lo trabalhista Jeremy Corbyn aviá promés de tornar negociar la sortida britanica de l’Union Europèa e de convocar un segond referendum amb l’opcion de se manténer dins l’UE sus la taula. La promessa d’aquel segond vòte, qu’èra estat una demanda abituala dels activistas partisans de demorar dins l’UE, sembla d’aver pas convencuda la majoritat dels votants. De fach, i a agut de zònas tradicionalament trabalhistas qu’an votat per Johnson pr’amor de sa promessa de complir lo Brexit.
 

“Let’s get Brexit done, but first, my friends let’s get breakfast done”

Prime Minister Boris Johnson celebrates his victory, saying “as the nation hands us this historic mandate we must rise to the challenge and the level of expectations”https://t.co/XDCEAqTjWx#BBCElectionpic.twitter.com/gqZAVe7KqS

— BBC News (UK) (@BBCNews) December 13, 2019

 
Escòcia: granda victòria dels independentistas
 
D’autre caire, l’independentisme escocés a recobrada una bona part dels sètis qu’aviá perduts a las eleccions del 2017 e s’es impausat practicament dins totas las circonscripcions. L’SNP a obtenguts 48 deputats, es a dire mai de l’80% dels sètis que se votavan en Escòcia. Aquel resultat refortís la posicion de Nicola Sturgeton fàcia a un segond referendum d’independéncia.
 
“Boris Johnson a un mandat per traire Anglatèrra de l’Union Europèa mas deu acceptar qu’ieu n’ai un per donar a Escòcia una alternativa per son avenir”, çò a declarat la primièra ministra escocesa. “Escòcia a mandat un messatge fòrça clar: volèm pas un govèrn de Boris Johnson e volèm pas quitar l’UE”, çò a precisat.
 

Nicola Sturgeon reacts to Lib Dem leader Jo Swinson losing her seat to the SNP.

Follow the #GeneralElection results live: https://t.co/meuSxFO6V9pic.twitter.com/MeuyWi4DXR

— Sky News (@SkyNews) December 13, 2019

 
Irlanda del Nòrd e Galas
 
Dins lo Nòrd d’Irlanda, lo Partit Unionista Britanic a ganhadas las eleccions mas a perduts de vòtes e de deputats del temps que lo Sinn Féin melhorava lo resultat de 2017 e passava de 4 a 7 representants.
 
En Galas, los trabalhistas an ganhat un còp de mai, aqueste còp amb 22 deputats, 6 mens que fa dos ans. D’autre caire, los Tories an melhorat de resultats e n’an  obtenguts 14. Los independentistas del Plaid Cymru mantenon lors quatre sètis.




Los resultats: