De deputadas dels partits de l’oposicion an interpretat al parlament de Turquia la performança “Un violaire sus ton camin” que l'inicièt l’organizacion feminista de Chile sonada “Las Tesis” e qu’a capvirat lo Mond. Es atal qu’an protestat contra la detencion de sèt feministas acusadas “d’insultes al president” quand cantavan Loviolaireèstu. Las deputadas an profechat de lor immunitat per interpretar la meteissa performança mentre que los deputats del Partit Republican del Pòble (CHP) mostravan d’afichas amb de fotografias de victimas de la violéncia masclista.
 

Powerful: After Turkish police breakup #LasTesis women’s protest in Istanbul last week+then in nation’s capital of Ankara, women of oppostion parties do protest in parliament—saying they have political immunity to do so—direct anger at Interior Minister.
pic.twitter.com/q2FWCwF7Ta

— Louis Fishman (@Istanbultelaviv) December 14, 2019

 
 
Sèt detengudas e qualques nafradas per insultes al president
 
La setmana passada, environ tres cents femnas que cantavan e dançavan aquel imne feminista foguèron atacadas per la polícia, e lo ministèri public n’a denonciadas sèt per “ofensas a l’estat”. Concretament, aqueste considèra qu’an mancat a l’article 301 del còde penal turc que prevei de penas de 24 meses de preson per “ofensas publicas a la nacion turca, a l’estat, al parlament, al govèrn o als jutges”. Las set detengudas aurián tanben, segon los procuraires, enfranguda la lei de manifestacions e aurián comés lo delicte “d’insultes al president”.
 
La violéncia masclista es fòrça presenta dins lo debat politic en Turquia. Las organizacions feministas e esquerristas acusan lo govèrn, conservator e d’orientacion islamista, de non tocar pas las causas del problèma.
 
L’Union dels Collègis d’Avocats de Turquia a reprochat al govèrn d’Erdogan d’arrestar de feministas en luòc de “luchar contra los crimes masclistas”.
 
 
Un imne feminista mondial
 
La performança creada per Las Tesis se tenguèt per criticar l’impunitat dels que viòlan e tuan de femnas, e faguèron una accion espectaclosa davant lo palais de justícia de Santiago de Chile ont de milièrs de femnas amb los uèlhs bendats en negre faguèron un cant e una dança. Las paraulas asseguran que lo patriarcat es darrièr los actes de la justícia, de l’estat, dels policièrs, dels jutges e mai del president.