capçalera campanha

Actualitats

InternacionalPoliticaSocietat

Nòva accion de Tsunami Democratic al Barça

L’organizacion anonima independentista catalana a volgut profechar del resson mediatic de la partida entre lo Barça e lo Real per far ausir las revendicacions de crida al dialòg e a la libertat dels presonièrs politics

Una nòva e espectaclosa accion de protèsta se tenguèt ièr a Barcelona. Mai de 40 000 personas s’amassèron près dels accèsses a l’estadi de fotbòl ont se joguèt lo Classic, lo dèrbi entre las esquipas del F.C. Barcelona (lo famós Barça) e lo Real Madrid. Los organizaires de la protèsta profechèron de l’enòrme resson mediatic qu’aviá la partida per far ausir lors revendicacions.
 

De milièrs de pancartas e una partida interrompuda durant doas minutas
 
D’efièch, l’organizacion anonima independentista catalana Tsunami Democratic convoquèt per mejan de son aplicacion e de sos canals de difusion, en particular lo de Telegram, los ciutadans a s’amassar a l’entorn de l’estadi de fotbòl del Barça, lo celèbre Camp Nou, per una accion de protèsta. Se tractèt pas de blocar l’accès dels suportaires a l’estadi, mas d’i difusar un messatge revendicatiu. Se distribuiguèt en particular de pancartas que demandavan a Espanha de cessar la repression e de dialogar amb Catalonha, amb lo lèma “Spain, sit and talk” (Espanha, assèta-te e parla), e que lo public alcèt dins l’estadi en demandant la libertat pels presonièrs politics e l’independéncia. Sembla que d’agents de seguretat del Barça volguèsson empachar l’intrada d’aquelas pancartas, mas èran pertot dins lo Camp Nou, e aital creèron una marèa blava. Dins lo segond mièg temps, dètz minutas après la represa, una pluèja de balons lançats pels suportaires interrompèt durant doas minutas la partida, çò que la television assagèt de mostrar pas en tornant difusar al meteis moment d’autres imatges del rescontre esportiu.
 

D’incidents a l’entorn del Camp Nou
 
Mentretant, a l’entorn de l’estadi, d’incidents opausèron de protestaris a las fòrças de polícia. Se cremèt de contenedors e los Mòssis d’Esquadra faguèron qualques cargas.
 
Amb aquela accion contunhan las protèstas socialas en Catalonha après lo verdicte de la Cort Suprèma espanhòla que condemnèt nòu elegits e caps socials catalans a de penas d’entre 9 e 13 ans de preson. Dos ans après lo referendum independentista e dins un encastre repressiu, las protèstas venguèron fòrça pus intensas tre lo 14 d’octòbre passat, quand se rendèt public lo verdicte. De soslinhar lo blocatge de l’aeropòrt de Barcelona o de l’autorota A9 sus la frontièra interestatala entre Catalonha Nòrd e Catalonha Sud.
 
 
Lo Tsunami Democratic
 
Aquesta nòva accion de protèsta es estada coordenada pel nomenat “Tsunami Democratic“, un movement ciutadan bastit que fonciona sus Internet per mejan d’un canal de Telegram e que coordena los activistas per mejan d’una aplicacion de telefòn mobil. Sa tòca es de coordenar de protèstas massissas contra la repression politica que la patís l’independentisme catalan.
 
La justícia espanhòla a dobèrt una enquèsta contra Tsunami Democratic en l’acusant de terrorisme. A mai, las fòrças de seguretat an ensajat de barrar lo sit web e d’eliminar l’aplicacion dels serveires d’Internet mai d’un còp. Pasmens, los activistas o an restaurat tot del temps que la Comission Europèa a avertit l’estat espanhòl que deu cercar un equilibri entre “libertat d’expression e seguretat”.
 
Tsunami Democratic se presentèt amb un manifèst, que demandava de non renonciar pas a la defensa dels dreches individuals e collectius e disiá que per o far caliá una lucha democratica, organizada e determinada, que se fondèsse sus la desobesissença civila e sus la lucha non violenta. Sens cap de mena de violéncia “mas amb tota fermetat”, çò precisava.
 
 
 
 
 
 
abonar los amics de Jornalet
 
 

 
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Hilh
5.

Lo barça que joguè mau, qu'estóm chançós d'arrapar lo nul. Per çò qu'ei de la politica, cranhi qu'aquera agit-prop n'embestii pas sonque lo quite club e la liga. Lo govèrn que se'n deu fóter...

  • 0
  • 4
Emmanuèl Isopet
4.

#2 Las equipas (de fotbòl o de rugbi) son benlèu mens marcadas politicament en çò nòstre. Los (grands) clubs revendican pas gaire al nivèl cultural (e parlem pas del politic). Donc... es pas possible en çò nòstre (pel moment e en esperant m'enganar).

  • 7
  • 0
Ròdrigo Bigòrra
3.

#2 Adixatz nosautis enas pireneas que'ns en fotem pas mau de Marselha e'ths de qui segueixen eth rugbi que sont tots suportaires der'euipa de França !

  • 2
  • 13
Gèli Grande Lairac en Agenés
2.

Dins l'estat francés pel fotbòl avèm lo classic Olimpic de Marsilha (O.M.) contra Paris Saint Germain (P.S.G.).
Contra la Blanquerada (la lei Blanquer) qu'assassina l'ensenhament de la nòstra lenga quora farèm coma los catalans quand lo PSG se vèn passejar del costat de l'Estadi Velodròme ?
O al rugbi de XV a Tolosa quand l'Estadi Tolosan recep lo Stade Français o lo Racing Club de France ?

  • 10
  • 1
Pitaluga
1.

La television espanhòla, totjorn pudica ela, a amagat lo lançament de balons jaunes sus la pelena. Aürosament, se pòt veire sus las rets socialas... a condicion de far pas l'estruç e d'acceptar de s'entresenhar en defòra de la "caja tonta" (lo fenestron).
Pels comentaris (qu'es dificil d'i escapar en Espanha) se vei que los nacionalistas espanhòls se preparavan a una victòria del Real Madrid. Sabi pas perqué sul plan esportiu, m'entrèvi pas de fotbòl. Pensi que lor desir de daissar moquet sus aquel plan los catalans en plen Tsunami Democratic lor faguèt prene lors desirs per de realitats. Ara son enfuscats pel resultat nul, nullissim per eles.

  • 8
  • 0

Escriu un comentari sus aqueste article