Revirada europèa per la justícia espanhòla. La Cort de Justícia de l’Union Europèa en Luxemborg a prononciat sa senténcia: l’elegit e presonièr politic catalan Oriol Junqueras ten l’immunitat coma eurodeputat. E mai la Cort Suprèma espanhòla lo condemnèsse a 13 ans de preson per sedicion, segon los jutges europèus Junqueras deviá èsser liberat de la preson preventiva lo 26 de mai quand foguèt elegit deputat europèu.
 
Segon lo president del tribunal, Koen Lenarts, Junqueras aviá drech d’assistir a la sesilha constitutiva del Parlament Europèu a Estrasborg. Per aquela rason, considèra que se la justícia espanhòla lo voliá manténer en preson preventiva, auriá degut demandar una comission rogatòria a l'eurocambra.
 
De soslinhar que las decisions de la Cort de Justícia de l’Union Europèa son pas executòrias, mas que ditz solament d’opinions e d’interpretacions del drech europèu que son contrenhentas. Ven ara a la Cort Suprèma espanhòla de prene las decisions oportunas per ajustar la situacion de Junqueras coma eurodeputat amb lo critèri que l'a exprimit uèi la Cort de Justícia de l’Union Europèa.
 

#TJUE : una persona elegida al Parlamento Europeo adquiere la condición de miembro de dicha institución desde la proclamación oficial de los resultados y goza desde ese momento de las inmunidades derivadas de tal condición + PRESS RELEASE #Junquerashttps://t.co/0b08fa4nB4pic.twitter.com/9si9E3WdYO

— EU Court of Justice (@EUCourtPress) December 19, 2019

 
 
Lo tribunal espanhòl condemnèt Junqueras a 13 ans de preson e d’inelegibilitat lo 14 d’octòbre passat, quand èran encara en espèra de resolucion las questions prejudiciàrias que lo jutge president d’aquel tribunal, Manuel Marchena, avián formuladas a la Cort de Justícia de l’Union Europèa. Mas dins aquela meteissa senténcia se disiá que se daissava en suspension la condemnacion per inelegibilitat de Junqueras (non pas la de preson) en tot esperar la decision de la Cort de Luxemborg. Mas ara, la cort europèa especifica pas s’Espanha deu liberar Junqueras, e even als jutges espanhòls de prene una decision que s’ajuste al critèri que l'a fixat uèi lo TJUE.
 
Junqueras a reagit sus Twitter en demandant que s’anulle la senténcia e en exigissent la “libertat per totes”.
 

La justícia ha arribat des d'Europa. S’han vulnerat els nostres drets i els de 2.000.000 de ciutadans que ens van votar. Nul·litat de la sentència i llibertat per tothom! Persistiu com ho hem fet nosaltres! #JunquerasImmunity

— Oriol Junqueras (@junqueras) December 19, 2019

 
 
Sul pic, dins la sesilha d' uèi del Parlament de Catalonha, lo deputat Ruben Wagensberg a explicat la nòva e los deputats se son exclamats en cridant “libertat”. Esquèrra Republicana e totes los partits independentistas demandan que s’anulle sul pic la senténcia contra los presonièrs politics catalans.
 

[VÍDEO] @wagensberg: "Acaba de ser confirmada pel TJUE la immunitat d’Oriol @junqueras, a qui fa 2 anys que dieu colpista. La justícia arriba. Junqueras ha de ser lliure✊ i demanem la nul·litat de la sentència del judici" pic.twitter.com/7bZ2XSYKbi

— Esquerra Republicana (@Esquerra_ERC) December 19, 2019

 
De son caire, David Grosclaude a reagit sus Facebook. “Qu'ei ua bona novèla per la democracia en Euròpa”, çò a dich. E mai afirma “que se'n va temps que lo poder de Madrid e sia rasonable e comenci de compréner que la democracia a la J. Borell non pòt pas foncionar, pas mei que la democracia a la Rajoy o a la Vox! E los autes estats europèus, que disen? Tostemps muts? ”
 

 
 
 
Pertòca tanben Puigdemont e Comín
 
La senténcia europèa d'uèi ditz: “La Cort de Justícia de l’Union Europèa a declarat en primièr luòc qu’una persona que ven elegida al Parlament Europèu aquerís la condicion de membre d’aquela institucion tre la proclamacion dels resultats electorals, e per tant [Junqueras] benefícia de las immunitats reconegudas per l’article 9 del protocòl”.
 
Per tant, aquela decision pertòca tanben lo president en exili, Carles Puigdemont, e l’elegit Toni Comín, tanben exiliat. Los dos foguèron tanben elegits eurodeputats lo 26 de mai passat e an demandat a aquel meteis tribunal que lor siá permés d’exercir coma tals.
 
 
Quim Torra condemnat a l’inelegibilitat
 
Mentretant, qualques minutas puèi, la justícia espanhòla a condemnat lo president de la Generalitat de Catalonha en foncions a un an e mièg d’inelegibilitat car lo considèra colpable de desobesissença per aver refusat de levar un riban jaune del balcon del palais de la Generalitat. Torra poirà ara presentar un recors a la Cort Suprèma de Madrid.
 
A 13h30, Torra farà una compareissença publica davant los mèdias.