— Lo dimenge 5 de genièr, serà fèsta a Lesinhan. La tribuna novèla serà inaugurada. De matin, los Dragons Catalans s’entraïnaràn sus la pelena del Molin. A miègjorn, un brave repais espèra los tretzistas. De vèspre, la dintrada serà a gratis per assistir als dèrbis Lesinhan-Limós en juniors U19 e en Elèit 1.
 
— La dimenjada seguenta, se tendràn los 16ns de la Copa Lòrd-Derby. Tres partidas se jogaràn entre pensionaris de l’Elèit 1: Vilanòva-Limós, Tolosa-Carcassona e Palau-Avinhon.
 
— Lo dissabte 18 de genièr, per una partida de preparacion abans la represa dels campionats de Superliga e del Championship, los Dragons Catalans e lo Tolosa Olimpic se rescontraràn a l’estadi Domèc de Carcassona (4h e mièja del vèspre ) sus çò que serà una jornada festiva pel XIII, amb aquí non pas un dinnar mas un sopar gostós (50 èuros lo sopar e la dintrada dins l’estadi; se marcar al prèp del secretariat de Carcassona XIII carcassonne-xiii@oran...

— Mesfisatz-vos del gos: lo talonaire dels Dragons McIlorum s’es fait operar de la man que son gos l’aviá mossegat.
 
— Formacion: los joves Baptiste Fabre (Albi) e César Rougé (Limós) van prene part al camp d’entraïnament prepausat per la Tempèsta de Melbourne a de joves esportius de la planeta.
 
— Copa occitana: la Copa Lòrd-Derby serà la convidada dels Reis de l’IEO-Aude lo divendres 3 de genièr a l’Ostal Sirventés a Carcassona (a 6 oras del vèspre)
 
— Lo libre: per las estrenas, procuratz-vos lo libre indispensable e fondamental de Danís Arcàs: Rugby à XIII, il était une fois… le rugby de liberté (1933-1941).
 
— Television: alara que los Dragons sabon pas s’auràn un difusaire TV, BeInSport torna passar aquesta fin de setmana la finala NRL e lo tresen Estats d’Origina de 2019.