La Cort Suprèma dels Païses Basses obliga lo govèrn de reduire d’un 25% l'emission de gases d'efièch de sarra. Los jutges an decidit que l'executiu del país deu reduire aquelas emissions mai lèu que çò qu'èra previst e qu'a la fin de l'an 2020 los nivèls devon èsser almens al dejós del 25% de las donadas registradas en 1990.
 
Los jutges se son apiejats sus divèrses articles de la Convencion Europèa dels Dreches Umans e establís que lo risc que lo supausa l'urgéncia climatica "pòt afectar seriosament lo drech de viure e lo benèsser dels ciudatans olandeses".
 
Los avocats de l'estat defendián que se pòt pas responsabilizar solament los Païses Basses d'un problèma global coma la crisi climatica, mas los jutges an estimat qu'aquel fach "pòt pas desliurar un país de sas responsabilitats a l'ora de prene de mesuras".
 
A mai, la justícia a rebutat un dels arguments dels avocats de l'estat, qu'avián presentat un darrièr recors a una senténcia dins la quala la justícia donava rason a una plataforma ciutadana nomenada Urgenda.
 
Aquela senténcia poiriá aver d'efièches immediats perque la Cort Suprèma es lo tribunal de darrièra instància e lo govèrn pòt pas pus far cap de recors.
 
Lo país ten de gròssas indústrias e lo principal pòrt d'Euròpa, Rotterdam. A l'ora d'ara, es un dels estats pus polluidors del continent.
 
La directritz d'Ugenda, Marjan Minnesma, a declarat als mèdias sa satisfaccion. Per ela, "es bon que los jutges escoten la sciéncia. Cresi qu'aquela decision ajudarà a la presentacion de denóncias dins d'autres païses".
 
En mai d'aquò, Minnesma a remembrat qu'una bona partida del país es "jos lo nivèl de la mar" e que s'aquel nivèl pojava, aurián "un problèma plan seriós".