Lo procuraire general de l’Arabia Saudita, Shalaan As Shalaan, a dich que la senténcia per l’assassinat del jornalista Jamal Khashuqji (sovent transcrich Khashoggi) condemna a la pena capitala cinc personas e d’autras tres a la preson. Khashuqji foguèt assassinat dins lo consolat saudian a Istambol en octòbre de 2018 per un comando qu’èra exprèssament partit del reialme arabi, pretendudament amb l’intencion de lo convéncer que tornèsse al país, perque viviá en exili als Estats Units.
 
Coma o a anonciat As Shalaan, un ancian conselhièr reial, Saud Al Qahtani, foguèt tanben mes en examen pel crime, mas fin finala es pas estat condemnat. Fa ara un an, l’ÒNU denoncièt las insufisenças del procès e indiquèt que i aviá “de pròvas crediblas” qu’implicavan lo prince saudian dins aquel crime.
 
Khashuqji trabalhava pel jornal The Washington Post e èra fòrça critic envèrs lo regim de l’Arabia Saudita. Segon la CIA, lo jornalista auriá contactat l’ambaissador saudian als Estats Units per obténer los papièrs per se maridar, e l’ambaissador, qu’es lo fraire del prince eiretièr, li auriá respondut que s’adreicèsse al consolat d’Istambol, qu’aviá la garentida del prince que tot se passariá plan. Aquí lo tuèron.