Dijòus passat, fa uèi exactament una setmana, la Cort de Justícia de l’Union Europèa en Luxemborg prononcièt la senténcia segon la quala l’elegit e presonièr politic catalan Oriol Junqueras ten l’immunitat coma eurodeputat. E mai la Cort Suprèma espanhòla lo condemnèsse a 13 ans de preson per sedicion, Junqueras, segon los jutges europèus, deviá èsser liberat de la preson preventiva lo 26 de mai quand foguèt elegit deputat europèu. Per tant, aquela decision pertòca tanben lo president en exili, Carles Puigdemont, e l’elegit Toni Comín, tanben exiliat. Los dos òmes venguèron tanben eurodeputats lo 26 de mai passat e avián ja demandat a aquel meteis tribunal que lor foguèsse permés d’exercir coma tals. Tanlèu que la cort de Luxemborg aguèt prononciat sa senténcia,  i reagiguèt lo president del Parlament Europèu, David Sassoli, qu’exigiguèt de las autoritats espanhòlas qu’executèsson la senténcia del temps que demandava als servicis de l’eurocambra qu’analisèsson los efièches d’aquesta sus la reconeissença de Puigdemont e Comín, e l’endeman los dos elegits catalans en exili èran dins l’eurocambra per prene lors acredicions coma eurodeputats.
 
Mas Sassoli trobèt un empediment. La presidenta del grop socialista europèu, l’espanhòla Iratxe García, lo quichèt per que faguèsse pas çò que la justícia exigissiá. Atal o explicava lo jornalista de Libération, Jean Quatremer, qu’es especializat en politica europèa. Lo jornalista explica que pendent la reünion amb los presidents dels grops parlamentaris Sassoli defendèt que lo tribunal èra estat clar e que, a mai, aquò èra una bona nòva pel Parlament Europèu, perque los eurodeputats veson reconeguda lor immunitat. García li demandèt de se rescontrar abans la represa de la sesilha plenària e s’amassèron dins una sala del parlament ont i aviá fòrça foncionaris europèus. Quand aguèt tornat començar la convèrsa, en vesent que Sassoli cambiariá pas de vejaire, García perdèt paciéncia e comencèt de cridar: “O pòdes pas far, aquò, a Espanha! T’avisas de çò qu’ès a mand de far?” Tan granda èra sa colèra, segon Quatremer, que García getèt al sòl los papièrs que portava.
 
L’endeman, quand Puigdemont e Comín obtenguèron lor acreditacion coma eurodeputats, Quatremer ditz que contunhèron alavetz las manòbras d’Espanha per empachar de reconéisser los dreches politics dels independentistas. Conscienta de la dimension mediatica que l’implicava l’acreditacion de Puigdemont e Comín coma eurodiputats, l’administracion del Parlament Europèu, la meteissa qu’en junh aviá refusat de los acreditar sus instruccion de Madrid, decidiguèt de lor donar una acreditacion provisòria, d’un jorn solet, per ganhar de temps mentre qu’estudiavan la novèla situacion juridica. Totun, a causa  de la tension que la provocava la situacion, los foncionaris s’enganèron e lor donèron una acreditacion provisòria per un periòde d’un an.

 

---

De legir sus Libération: Crise de nerfs espagnole à Strasbourg
 
 
 

Lundi, c’est Coulisses! Aujourd’hui, la réaction des Espagnols à l’arrêt de la Cour de justice européenne sur les députés catalans. Ça déménage...https://t.co/yGCk25NoTG

— Jean Quatremer (@quatremer) December 23, 2019