Atemptat terrorista a Mogadisho: almens 94 mòrts e 100 nafrats
 
Lo govèrn somali sospiècha lo grop jihadista As Shabab, responsable principal d’aquela sòrta de masèls en Somalia
 
Almens 94 personas mòrtas e gaireben un centenat de nafradas es lo tragic bilanç de l’atemptat terrorista près de Mogadisho dissabte passat. Los assalhidors faguèron espetar un camion al sud-oèst de la capitala de Somalia, segon çò qu’a raportat a Reuters una organizacion umanitària presenta dins lo país african qu’a quitament un deputat un al parlament.
 
Aquel bilanç confirma las informacions balhadas pel deputat Abdirisak Omar Mohamed, que raportèt 17 policièrs mòrts, 73 civils somalis e 4 estrangièrs. Segon de fonts medicalas anonimas de l’espital de Medina, lo nombre de personas nafradas vira a l’entorn d’una centena. Demest los quatre mòrts estrangièrs i auriá almens dos ciutadans turcs d’una còla d’engenhaires.
 
L’ataca la provoquèt l’explosion d’un camion sus un caireforc de la vila d’Afgooye, a un vintenat de quilomètres de Mogadisho,  fòrça frequentat pels veïculs que van a la capitala. Près de l’explosion i a los burèus dels servicis de la circulacion, ont se gandisson sovent de desenas de ciutadans que van cada jorn pagar lors taxas o multas de circulacion. Es çò qu'explica que lo nombre de mòrts siá talament naut.
 
Es lo tresen atemptat pus sagnós de l’istòria recenta de Somalia après lo que raportèrem en octòbre de 2017 ont lo grop jihadista As Shabab revendiquèt mai de tres cents mòrts.

 
 

#Somalie: après le grave attentat terroriste d'hier qui a fait plus de 100 morts, un avion cargo turc a atterri aujourd'hui à #Mogadishu pour rapatrier les blessés les plus graves vers la #Turquie

La Turquie est de loin le principal soutien de la Somalie https://t.co/kgN15EXckB

— Desertup (@Desertup) December 29, 2019