Lo sit web de Trobasons comença l’an amb una celebracion: nascut en març passat, lo sit amassa ja mai de 10 000 cançons en occitan. Mentre qu’escrivèm aqueste article, lo sit prepausa d’informacions sus 316 artistas, 858 albums, 10 065 cançons, 2808 audios, 1257 vidèos e 824 pochetas.
 
Trobasons nasquèt en març de l’an passat en seguida de la draia marcada per Paraulas en Òc, e sa tòca es d’amassar tota la musica en occitan. D’efièch, Trobasons prepausa un catalòg de la musica en lenga nòstra classat per artistas, disques e cançons. Cèrca de conténer tota la musica en occitan, sens qu’impòrte l’origina nacionala ni la lenga mairala dels artistas, en prepausant, ansin, las paraulas de las cançons, per legir, comprene e aprene a cantar çò que s’escota. E mai i cabon d’àudios e de vidèos ajustats de cèrtas plataformas legalas coma Youtube, Spotify o Deezer, entre d’autras, e lo sit facilita la crompa dels disques o de las cançons a travèrs de las principalas botigas numericas coma iTunes, Amazon o Google Music.


Trobasons l’a aviat la còla de Viasona, lo sit equivalent en catalan, e lo sosten
la Generalitat de Catalonha. Tanben lo sosten Jornalet: amb la còla de Trobasons avèm un pache de cooperacion de sòrta que lo sit prepausa las actualitats jornadièras que publica aqueste jornal, e que Jornalet consagra tanben un espaci a Trobasons.
 
Trobasons concretiza e ordena un patrimòni immens dins lo temps e l’espaci, jamai catalogat de manièra tan precisa coma fins ara.

 

Acabam l'an amb mai de 10.000 cançons indexades a #Trobasons, lo web qu'amassa tota la musica en occitan e compta amb amb lo supòrt del Departament de Politica Lingüistica de la Generalitat de Catalonha (@llenguacatalana) pic.twitter.com/dvZm2AcpKf

— Trobasons (@Trobasons) December 30, 2019