Lo Ralli Dakar se tendrà ongan en Arabia Saudita, e l’organizacion a ja mandat als participants una tièra de recomandacions, o saique de menaças, per s’adaptar als diferéncias culturalas, e politicas, d’aquel país governat per un sistèma sòciopolitic e religiós extrèmament rigorista sonat wahhabisme.
 
Es atal que s’es anonciat que son enebits l’alcòl e la carn de pòrc e que los que ne prendrián “pòdon èsser enseguits en justícia”. Aquò cambiarà l’imatge qu’aviam de las vespradas ont los pilòts e lors esquipas manjavan de pòrc e bevián de cervesa après la jornada abans de se pausar.
 
Quant a las drògas, s’especifica que lor consum es “durament punit”, quitament amb la “pena capitala”.
 
 
Enebisson lo velós e los vestits ajustats
 
Mas la seccion qu’a causat mai d’estonament es que “tant los òmes coma las femnas se devon vestir en public amb discrecion en evitant lo velós estrech”. E mai s’especifica que “totas las femnas se devon cobrir las espatlas e los genolhs”.
 
 
E de se tocar las mans
 
Es tanben estonanta la seccion que parla del comportament en public ont se ditz que “se prene las mans o mostrar d’afection en public pòt venir ofensant”. D’efièch, la guida afirma que las demostracions publicas d’afeccion pòdon èsser “contràrias a la decéncia publica” e que pòdon doncas ocasionar “de detencions”.
 
Tanben cal far atencion als “produches culturals importats”, coma los DVD, libres o revistas, que devon pas aver cap de contengut pornografic ni mai erotic.
 
 
Lo salafisme saudita
 
Lo wahhabisme (de l’arabi  الوهابية‎, al wahhābiyya) es un movement fondamentalista qu’es vengut lo sistèma sòciopolitic oficial en vigor en Arabia Saudita. S’agís d’un sistèma religiós extrèmament rigorista, a causa de la cresença de son fondador que tot çò qu’apareguèt dins l’islam après las tres primièras generacions a partir del profèta èra innovator e corrompiá la fe. Per tant, lo wahhabisme preconiza d’utilizar sonque lo Coran e los Hadits coma font de la religion, e de se passar de quina autra nocion que siá portada per la tradicion. Se caracteriza tanben per sa volontat d’espandiment e, a l’ora d’ara, a estendut considerablament son influéncia amb la creacion de centres d’estudis e de mosquetas per tot lo Mond, finançats amb l’ajuda de las ressorsas economicas de la dinastia saudita. Tant Al Qaida coma l’Estat Islamic an lor font ideologica dins lo wahhabisme, que se coneis tanben amb lo nom de “salafisme saudita”.