L’èx-president de Renault, Mitsubishi e Nissan, Carlos Ghosn, a fugit Japon d’un biais espectaclós e rocambolesc e se seriá servit de documents d’identitat franceses per s’installar en Liban. Jutjat en Japon per malversament de fonzes mentre qu’èra al cap dels empèris automobils, Ghosn èra assignat a domicili e susvelhat per de camèras de videosusvelhança.
 
Segon la television libanesa MTV, Ghosn auriá organizat un concèrt de Nadal e auriá fugit en s’amagant dins la caissa d’un grand instrument de musica. Arribèt en Liban amb un avion privat après passar per Turquia. The Wall Street Journal apond que la fugida èra planificada dempuèi longtemps e que sa femna, Carole, aguèt un ròtle clau dins l’organizacion de l’escapada. Carlos Ghosn èra assignat a domicili, privat del drech de parlar amb sa molhèr e aviá un accès restrench a Internet. Segon d’informacions que i a, l’ambaissador de Liban en Japon lo vesitava cada jorn.
 
Ghosn a los ciutadanatges brasilièr, francés e libanés, mas aviá liurat sos tres passapòrts a las autoritats japonesas tant que durariá lo jutjament. Pasmens, las autoritats libanesas an dich que prendriá pas cap de mesura car Ghosn es intrat en Liban amb son passapòrt francés. Liban, d’efièch, a pas cap d’acòrdi d’extradicion amb Japon.
 
Carlos Ghosn es jutjat en Japon per aver desvirat environ 70 milions d’èuros de Nissan per son usatge personal. Rebuta aquelas acusacions e assegura qu’a fugit “l’injustícia e una persecucion politica”.