La justícia bèlga a decidit de suspendre lo mandat d’arrèst europèu contra lo president de la Generalitat de Catalonha en exili, Carles Puigdemont, e lo conselhièr Toni Comín, pr’amor de lor immunitat coma eurodeputats. Lo jutge que deviá decidir ièr s’acordava l’extradicion dels elegits catalans devèrs Espanha considèra d’efièch que los exiliats catalans tenon immunitat coma parlamentaris europèus, en conformitat amb la senténcia que la prononcièt la Cort de Justícia de l’Union Europèa en Luxemborg lo 19 de decembre passat.
 
Lo 14 d’octòbre passat, lo jutge espanhòl Pablo Llarena emetèt un novèl mandat d’arrèst europèu contra los elegits catalans en exili, en los acusant de sedicion. O faguèt just après que la Cort Suprèma espanhòla aguèt prononciat sa senténcia contra los presonièrs politics catalans en los condemnant a de penas d’entre 9 e 13 ans de preson per sedicion. Tres jorns pus tard, Puigdemont se presentèt a la polícia bèlga que lo menèt davant lo procuraire e un jutge que lo daissèt liure a condicion que foguèsse totjorn localizable e quitèsse pas Belgica. Lo jutge decidiguèt d’esperar que la Cort Europèa de Luxemborg diguèsse quicòm a prepaus dels independentistas catalans elegits eurodeputats enseguits per la justícia espanhòla, çò es Oriol Junqueras, vicepresident catalan en preson, e Puigdemont e Comín, que son en exili.
 

Belgian justice recognizes our immunity and decides to suspend the arrest and extradition warrant! @toni_comin.
But now we are still waiting for the release of @junqueras, who has the same immunity as us. Spain must act in the same way as Belgium has done and respect the law

— Carles Puigdemont (@KRLS) January 2, 2020

 
 
Lo cas de Junqueras
 
Lo 19 de decembre passat, la Cort de Justícia de l’Union Europèa en Luxemborg prononcièt sa senténcia: l’elegit e presonièr politic catalan Oriol Junqueras ten l’immunitat coma eurodeputat. Foguèt una fòrta revirada contra la justícia espanhòla que sa Cort Suprèma l’aviá condemnat a 13 ans de preson per sedicion. Segon los jutges europèus, Junqueras deviá èsser liberat de la preson preventiva lo 26 de mai quand foguèt elegit deputat europèu.
 
Ara Junqueras es a esperar que la Cort Suprèma resòlga l’afar, qu’es sus la taula del ministèri public e de l’avocat general de l’estat espanhòl. D’un caire, lo ministèri public sosten que Junqueras deu demorar en preson car la senténcia del 14 d’octòbre de la Cort Suprèma espanhòla anulla l’immunitat, mas, d’autre caire, lo burèu de l’avocat general de l’estat sosten que Junqueras a drech d’exercir sas foncions coma eurodeputat, en demandant que s’assegure que complirà totun la pena.