E mai ajam agut esitat a sonar Olanda los Païses Basses, desenant l’afar es clar. Encara que lo govèrn neerlandés aja emplegat fins ara la marca Olanda per nomenar tot lo país, a partir d’aqueste an 2020 aquel nom es pas pus valid per designar totes los Païses Basses.
 
Olanda es en realitat lo nom de doas províncias d’aquel país: l’Olanda del Nòrd e l’Olanda del Sud. Es verai qu’i cap la partida pus toristica del reialme, amb las vilas d’Amsterdam, la capitala lo motor economic del país, de Rotterdam, lo pòrt pus important, e de l’Aia, qu’es lo sèti del govèrn e del parlament.
 
Fins ara, lo govèrn neerlandés emplegava lo nom d’Olanda per tot lo país sus son sit web oficial, e quitament lo nom de l’abonament multitranspòrt public que lo prepausa lo govèrn als ciutadans de tota la planeta li disián “Holland Pass”.
 
Mas las autras dètz províncias se son plangudas, perque l’Olanda istorica, la de las doas províncias, s’atribuissiá tota la reputacion del reialme. Es aital que lo govèrn neerlandés a decidit que dempuèi 1r de genièr passat se pòt pas pus emplegar aquela sinecdòca coma nom de totes los Païses Basses.