Lo president de la Generalitat de Catalonha en foncions, Quim Torra, que la Comission Electorala espanhòla a decidit de destituir, a lo sosten del Parlament de Catalonha, segon çò que manifestèt la sesilha extraordinària de la cambra catalana dissabte passat. En mai d’aquò, Torra serà  capdavantièr a las negociacions entre los govèrns catalan e espanhòl previstas dins lo pache que l’a fach lo Partit Socialista espanhòl (PSÒE) amb Esquèrra Republicana de Catalonha (ÈRC) e que deuriá permetre a Pedro Sánchez d’èsser investit president del govèrn espanhòl.
 
E mai Pedro Sánchez aguèsse pas la majoritat absoluda dins lo vòte d’investidura de dimenge passat, deman dimars se tornarà votar e una majoritat simpla li permetrà d’èsser investit president. I aurà pas pro de vòtes contraris car ÈRC a promés una abstencion en seguida d’un acòrdi signat amb lo PSÒE que compren una taula de negociacion bilaterala entre los govèrns espanhòl e catalan. Del costat catalan, serà lo president Quim Torra que dirigirà las convèrsas.
 
 
Assumís lo risc d’èsser detengut
 
Per quant a sa destitucion, Torra a declarat a la television catalana TV3 qu’a recebut la notificacion de la Comission Electorala, mas qu’i manca lo resumit dels faches e l’argumentari que li arribaràn probablament deman. Torra espèra que la justícia acceptarà las mesuras provisòrias que las an sollicitadas sos avocats abans que la senténcia que lo declara inelegible venga ferma. En mai d’aquò, a apondut que se mandarà una question prejudiciala a la Cort de Justícia de l’Union Europèa.
 
Dins l’ipotèsi que los jutges ordenen que siá detengut pels Mòssis d’esquadra (la polícia de la Generalitat), Torra a dich qu’a pas jamai demandat a cap de foncionari que refuse de complir un mandat judiciari: “Una causa es la responsabilitat dels foncionaris e una autra es la dels politicians”. Dins aquel sens, a dich net e clar qu’el e son grop politic defendon “d’idèas, e aquela defensa mena de còps a de sacrificis” en tot remembrar que i a d’elegits en preson e en exili.