capçalera campanha

Actualitats

InternacionalPolitica

Indignacion en Portugal perque los ultradrechistas espanhòls l'incluson dins Espanha

Lo partit d’extrèma drecha Vox a cridat a manifestar amb una aficha que mòstra una mapa ont Portugal es en Espanha

| Susana Vera / Reuters / RTP

Lo partit d’extrèma drecha espanhòl Vox a cridat a manifestar davant totas las comunas de l'estat espanhòl lo 12 de genièr venent per manifestar contra lo pache entre lo PSÒE e ÈRC que permet que Pedro Sánchez siá investit aqueste dimars primièr ministre espanhòl. Pels ultradrechistas, que Sánchez siá president del govèrn gràcias a un acòrdi amb d'independentistas catalans es una "traïson". Mas, ailàs, aquela crida s'es facha amb una aficha que ditz "Espanha existís" e que mòstra la peninsula Iberica, Portugal inclús, e sens las illas Balearas ni los territòris africans de Sabta e Tamlilt. Aquel fach a provocat l'indignacion portuguesa.


Indignacion en Portugal en seguida de la convocacion de Vox, un partit ultradrechista espanhòl, de participar a una manifestacion davant las comunas de tot l’estat espanhòl. La mapa de la convocacion compren Portugal coma part d’Espanha. La television publica de Portugal RTP o a raportat largament en afirmant que l’extrèma drecha espanhòla considèra Portugal coma part de son país en recordant qu'en 1936 èra una aspiracion de la Falange e e de Franco:
 
«Las revendicacions de la drecha espanholista d’annexar Portugal an una longa preïstòria. Al començament de la guèrra civila espanhòla, Salazar contribuiguèt decisivament a salvar los putschistas, dirigits per Francisco Franco, quand la revòlta obrièra venquèt la conjuracion dins los nuclèus urbans principals.
 
Lo dictator portugués isolèt immediatament l’ambaissador republican, Claudio Sánchez-Albornoz, en tot anar tot drech devèrs una rompedura de las relacions diplomaticas. Malgrat que poguèsse pas reconéisser immediatament lo Conselh Militar de Burgos perque aviá pas reüssit a conquistar Madrid, se comportèt a l’escala internacionala coma una mena de representant informal d’aquel Conselh, que li faguèt ganhar l'escais sarcastic de “ministre dels Afars estrangièrs de Burgos”.
 
Una dels primièrs objectius militars de Franco foguèt d’ocupar Badajoz, près de la frontièra portuguesa, per tal d’i recebre una ajuda militara decisiva alemanda. L’Alemanha nazi, que prometiá al comitat de Londres de demorar nèutra, podiá pas fornir d'armas dirèctament a Franco e las enregistrèt coma d'exportacions a Portugal.
 
Malgrat l’enòrme deute politic amb Salazar, lo camp antirepublican comencèt lèu de prepausar, coma o fariá après la guèrra civila, d’annexar lo país vesin. Franco jamai non o comentèt publicament, mas permetèt la propaganda annexionista de la Falange, lo partit faissista dirigit per son conhat Serrano Suñer.
 
Aital, dins la fasa finala de la guèrra civila, la Falange anoncièt ja dobèrtament son intencion de recuperar tot lo territòri espanhòl fins als limits extrèms de sa “frontièra occidentala”, que s'expliquèt lèu que seriá la còsta oèst de Portugal. Las mapas distribuidas per la Falange ignoravan l’existéncia de Portugal e representavan tota la peninsula Iberica unida jos l’administracion madridenca.
 
Franco, mentretant, malgrat son silenci oficial, perdèt pas temps. Segon qualques documents descobèrts recentament per l’istorian espanhòl Manuel Ros Agudo, i aguèt quitament un òrdre de batalha, signat pel Caudillo, d’ocupar Portugal al començament de la Segonda Guèrra Mondiala —amb de divisions destinadas a partir devèrs Lisbona, O Porta e d’autras vilas e amb de rotas previstas per l’avançada d’aquelas divisions.
 
Mas l’Alemanha nazi trantalhava per s'engatjar sus un autre front de guèrra, al moment qu’alestissiá ja son ataca per suspresa de l'Union Sovietica. Per la meteissa rason favoriguèt pas la presa de Gibartar e diguèt a Franco qu’aviá pas amb son sosten, compte tengut de las previsiblas represalhas britanicas.»
 
 

 
 
 
 
 
 
abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

francesc palma
2.

De veritat, qu' es posin traquils los portuguesses, per què a Vox los bancs los an donat los diners que li donavan a Ciudadanos, per què no avia volgut obeir als banquiers e formar govern amb lo PSOE. Mas quan los Bancs, sustot cresi lo de Santader los retiren o los reduescan los diners, VOX es desinflarà coma un globus foradat. Son una cola d'ignorants que ni saben dibuixar una carta d'Espanha sense Portugal.

  • 4
  • 0
Pitaluga
1.

Recentament, una castelhana m'a dich que los portugueses son simpatics, ELES. Aquò amb pauc abans un comentari anti-flamenc: perqué parlan pas francés...
Tè, es que Portugal es independent mentre que d'autres, supausadament antipatics, o son pas.

  • 4
  • 1

Escriu un comentari sus aqueste article